唐家成發揮馬拉松精神

渣打馬拉松聽日就起跑，畢馬威會計師樓亞太區主席唐家成（Carlson）會同成班同事一齊參加。年屆五十六歲嘅Carlson仲係好fit，依家出trip都帶埋對跑鞋，務求今年可以喺一個鐘內完成10公里賽事。

畢馬威一直好鼓勵員工參加渣打馬拉松，仲特登請咗好手李嘉倫做教練，為啲同事提供訓練。Carlson話，跑馬拉松可以強身健體，又可以增強團隊精神，所以一直都係傳統。舊年，畢馬威就因為參與人數同籌款同樣高而攞咗企業挑戰盃最踴躍參與機構獎。今年有冇信心冧莊再攞獎呢？Carlson話今年參與人數就由舊年嘅234人升到256人，增加10%，有啲仲係特登由廣州同深圳南下參賽；而自己仲捐多咗25%，希望鼓勵同事踴躍參與。

出trip帶埋跑鞋練習

會計師嘅生活非常繁忙，但係有份參賽嘅會計師都話訓練一啲都唔辛苦，查實朝早起身跑完步先返工仲醒神添！Carlson都深表贊同，所以自己都勤力練習，出trip都帶埋跑鞋。佢今年仲帶埋囡囡同第一次參與嘅哥哥一齊落場跑，若然跑贏哥哥，仲可以贏到一餐添！

Carlson三月就榮休，退休後有咩計劃呢？Carlson話都係打吓golf跑吓步咁。不過，呢啲都係其次，原來唐太講到明會同老公一齊退休，睇嚟享受吓二人世界啦！