港股唔掂益到樓市?

兔年Paul少第一次同大家傾偈，當然要先同大家拜個年，祝願各位讀者今年置業路上亨通，年年有餘。言歸正傳，農曆新年期間，樓市淡靜已經係必然嘅事，跟住落嚟呢個禮拜，應該就係對新一年市況嘅第一個考驗。喺新春前，樓市出現反常嘅旺勢，Paul少班代理朋友都話，旺市嘅主要原因係，上年年尾政府出招打壓樓市，令到購買力積存咗兩個月，直至一月份終於爆發出嚟。不過，到依家農曆新年都過埋，之前積落嘅「老本」，亦都食咗一大截。究竟之後呢段時間，可唔可以持續旺勢，實在冇乜邊個「樓市專家」可以話實畀你聽。

業主觀望 周圍「冇盤睇」

尋日Paul少打電話畀「周董」拜年嘅時候，佢仲提到一個「未知之數」，就係市場嘅盤源仲剩番幾多。「周董」話，去到一月下旬，貼價嘅放盤其實已經畀市場吸納得八八九九，「冇盤睇」嘅聲音此起彼落；有近兩成業主都封盤唔賣住，有啲話會過年後先賣，有啲就話要睇定啲先，但最終會有幾多開番盤，喺嚟緊呢個禮拜就會逐步明朗化。「周董」話，其實佢班兄弟已經好落力，喺新春嗰幾日假期不停手咁打電話畀業主update個盤，希望可以盡快加大番個pool，如果唔係，二、三月份就算客源夠都做唔到多單。

樓市轉身慢 寧炒股

至於新春後另一大變數，就係股市嘅波動。早幾日股市開番，已經有朋友打電話嚟問Paul少，股市短暫時間不穩，會唔會係樓市嘅一個契機呢？呢位朋友所講嘅，其實咪又係所謂嘅「套股換樓」概念囉！老實講，Paul少向來唔係咁buy呢一套理論，因為物業相比起股票、衍生工具等等，投資方式同埋理念都好唔同，投資物業要有銀行按揭、租務市場等等去配合，又要睇一手新盤嘅動向而行；而且最緊要嘅係，以往物業投資「轉身」都比較慢，投資者唔可能見勢色唔對，或者見另一個市場更有前景，就即時抽資「轉會」；況且依家政府仲要加埋額外印花稅呢個「緊箍咒」，投資者除非見股市已經「冇得玩」，否則點會貿然將資金轉落樓市，坐貨等兩年呢？

順便預告一下，近排有好多人開始留意物業市場租金走勢，有人亦預言，隨住投資者「短炒變長揸」，租盤供應會持續升，影響未來一年物業租金回報，下個禮拜Paul少就同大家討論吓呢個問題。