股海實戰： 收租王領匯抗跌力夠強

港股喺大盤力沽下，繼續尋底。尋日恒指一連失守23,000點及22,800點，低位曾見22,668點，收報22,708點，跌455點，大市成交增至976億元，真係要錢唔要貨咁款！即使內地A股昨日反彈，滬綜指重越2,800點關，亦無濟於事，反映大戶真係求「去」心切！洗倉潮尚未完結，睇怕今個季度港股會繼續尋底，兔年之初股市狂「吐」，當真應景！

講到兔仔，特色係蹦蹦跳，但唔一定係愈跳愈高，關鍵在於每次跳躍嘅起點，若然一次比一次低，套用喺股市，則每次「彈跳」只能看成逃生機會！暫看短線恒指落到22,600點或有技術性反彈，但若然彈完又散，則下一支持位要睇22,100點。

如今睇嚟，近期滙控（00005）偏強，正係大戶托市出貨。本來話美國推QE2，資金會湧往新興市場，原來係一個美麗嘅誤會，眼前所見資金不斷撤出新興市場，重投歐、美，難怪近期美股不斷向上衝，港股卻不斷尋底。

形勢不妙，點都要正視吓持股組合，好在近日買入嘅港鐵（00066）係防守性股份，而歐、美經濟若受惠資金回流而加快復甦，出口相關股份將成受益者，故會繼續持有上月買入嘅天津港發展（03382）。至於中芯國際（00981），聽聞近日有分析員會議，今年下半年公司有望轉虧為盈。春江鴨水暖先知，昨日股價逆市向上，全日高位見0.69元，收報0.67元，升8.06%。

弱股成跌市奇葩，反而股價一直走強嘅中國南車（01766）卻變成大戶提款機，尋日質到落9.55元收市，跌幅6%。好漢不吃眼前虧，短線反彈若未能重上10元，會先沽出去年十一月底買入嗰5萬股，候低再撈貨。另外，第一拖拉機（00038）月初反彈未能企穩8元樓上，走勢比想像中差，下一個走貨機會係三月初兩會談論三農政策，此前若有好位落車，都係輸少當贏埋單計數！

近日內地人行加息，美國聯儲局局長伯南克用「驚訝」來形容，反應比想像中強烈，事關佢老人家認為，人行以加息應對通脹，只會抑制內需，讓人民幣升值係更好嘅做法。無錯，加快讓人民幣升值，完全符合美國利益，但對於經濟尚在結構轉型嘅中國則不然。

內房股可博反彈

回說個股表現，阿莊認為內房股已跌至極度超賣嘅水平，願意冒風險嘅股海「清兵」，可以留意小試牛刀博反彈嘅機會，(目及)實中國海外（00688）、華潤置地（01109）及富力（02777）。

避險之選當然不少得收租王——領匯房產基金（00823）。近日該公司宣布四月起旗下五十五個屋苑停車場嘅私家車車位月費平均加7.1%，另七十四個屋苑嘅貨車車位月費則平均加5.9%。雖然領匯係做公屋商場同停車場，但如今經已上市，在商言商，喺勞工成本上漲之下，旗下收租物業跟隨通脹上調租金係在所難免。

另一角度睇，若然嚟緊政府因應市民訴求「派糖」，公屋租戶獲租金優惠，相對其他私人屋苑商場，公屋商場消費受通脹影響較細，呢種情況亦唔係第一次見，加上領匯現價每單位息率達4厘，相信單位價格具備一定嘅抗跌力。

戰報

華潤微電子（00597）

冼金基上月二十四日介紹華潤微電子畀大家，當日低位只係0.385元，尋日再試新高0.465元，足足賺超過20%。

和電香港（00215）

阿莊上月十八日話和電香港業績躍進可期，尋日逆市呈強，創出3.01元新高，較推介日低位2.64元，升超過14%。