股海實戰：通天酒業 等住執平貨

內地春節假期完結前人行出招加息，搞到尋日兔年首個交易日A股紅盤低收，滬綜指收報2,774點，跌24點，跌勢已較想像中溫和。內地一月份非製造業商務活動指數按月下跌0.1個百分點至56.4%，若然嚟緊公布一月份CPI數據震撼，可能會引來中國經濟「硬着陸」嘅憂慮。

不過，阿莊認為，以平常心去諗，金融海嘯以後，中央投入4萬億元人民幣刺激經濟，致使中國GDP連年保持高增長，但如此「人為」嘅表現，實在難以長久。政府逐步抽身係必然嘅發展，至於如何淡出，讓市場回復本身嘅運作，將會係未來一、兩年中央政府面對的一項大挑戰。

雖然前晚美股高收，但無助扭轉港股弱勢，恒指昨日跌穿23,300點支持後跌勢加劇，低位曾見23,128點，收報23,164點，跌320點，成交大增至900億元，相信部分投資者已決心斬倉離場觀望，喺市場承接力進一步轉弱之下，要有心理準備今輪跌浪恒指或要下試22,800至23,000點支持，轉機係大藍籌公布嘅業績表現，以及下月初嘅兩會就宏觀經濟政策有何正面訊息發布。

未知是否投行因應內地經濟下行風險增加，調低內需股估值，尋日輪到鞋股遭拋售，百麗國際（01880）股價一度插至12.3元，收報12.58元，跌3.3%，成交3.25億元；而達芙妮（00210）亦跌3.4%，收報7元。

本來預期內地加息，保險股可受惠，誰知表現個別，平保（02318）、中國財險（02328）、中國太平（00966）、中國太保（02601）均告逆市高收，偏偏中國人壽（02628）卻斯人獨憔悴，股價抽上30.75元後反覆回落，低位見29.7元，收報29.8元，跌約1%，揸正國壽CALL輪者真係要及早去搵車公轉轉運﹗

睇番國壽幅走勢圖，其實舊年經已冇運行，嚟緊舊年八月底所做嘅低位29.35元不容有失，否則可能要繼續尋底。弱勢股1隻，手痕友唔好係又撈唔係又撈！

春節係內地酒品銷售旺季，早前阿莊都提過王朝酒業（00828），偏偏遇着投行調低內需股估值引發沽售潮，上月股價由高位回落逾兩成，至接近250日線3.5元水平才止跌，昨日收報3.65元。

市場增長潛力大

屬同類股嘅通天酒業（00389），跌浪比王朝更早展開，事緣去年十月底股價見2.4元後觸頂回落，十一月上旬公司宣布按每股2.08元配股集資後，股價持續向下，直至上月底兩次低見1.67元才轉穩，尋日裂口高開見1.78元後，一度重逾250日（1.78元），高見1.82元，收報1.76元，逆市升2.3%。通天主要銷售葡萄酒產品，隨着內地居民消費能力上升，酒精含量低、營養價值高嘅葡萄酒，市場增長潛力大，若然公司用心做好本業，應該有可為。

計及去年配股對每股盈利所造成嘅攤薄效應，保守估計現價一○年預測市盈率約十八倍。撇除不可臆測嘅風險因素，股價回落到1.5至1.8元區域，將會係一個較大承接區，加上春節後又係行業淡季，嚟緊兩、三個月係執平貨嘅好時機。

戰報

中盈國金資源

（00766）

錢進上周二揀中隻中盈國金資源，尋日逆市呈強，高見0.455元，較推介日低位0.395元升超過15%，果然夠眼光。

經緯紡機

（00350）

經緯紡機尋日強勢創6.48元新高，積奇於上月二十八日已經吼中咗，當日低位只係5.66元，累升逾14%。