泓富徐英略環保先鋒
管理泓富產業信託（00808）嘅泓富資產管理行政總裁徐英略，除咗擁有加拿大籍、講英文叻過講中文之外，仲有加拿大人環保嘅習慣。好似尋日佢哋與同系嘅置富產業信託（00778）一齊搞新春午宴，事前就由佢「發辦」食乜餸，魚翅、髮菜等影響生態嘅食物，佢一一Say No！
除咗飲食之外，佢都將環保概念融入自己管理嘅寫字樓入面。佢話，為咗要慳電同埋改善旗下寫字樓嘅出租率，佢就試過由地下，逐級逐級行上頂樓，實行逐層巡，諗吓有乜方法可以慳電。
佢哋仲分別投入40萬元和100萬元，為觀塘泓富廣場和紅磡都會大廈做綠化天台計劃，種花草樹木、加裝農圃，以及整風力和太陽能發電。