期指攻略：23550樓上可建淡倉

前日筆者還瞎猜，周二港股極有可能呈現高開低收格局，理由係市場普遍對今日A股重開不抱期望，收市未必繼續撐落去，勢必減低倉底避免過夜，昨日市況出奇地同預測十分接近，期指開23,610點，收23,391點，低水幅度在收市前一刻，好友主動平倉盤推動下，由前日的38點，擴大到尋日收市的93點。

似乎大市已經為今日A股紅盤低走做好準備，昨日比較意外，還是下午三時過後挾到23,625點，破埋早市高位23,615點才回頭，以為短期轉勢的炒家，又一次中伏。

即市試沽小注可博

一連兩日跌市，恒指已經將虎年最後半日市升幅，全部跌番出街，後市要扭轉劣勢，先要重返23,654點阻力樓上，中線24,040點阻力更是相當關鍵，升穿並企穩之前，即市逢高試沽贏面無疑較大，而一切揸倉都不適宜太勇，只宜小注一試。

大市今日焦點勢必落在A股身上，指數基金A50（02823）昨日雖然反彈，但睇番較富時A50指數的溢價，由上月初高位15.5%，縮到昨日得番9.3%，是接近五星期最低，似乎大孖沙對A股春節假期後展望只係抱審慎態度，港股偷步跌兩日，今日或有即市反彈，但只要見23,550點樓上，筆者會嘗試建立淡倉，並以23,654點作即市止蝕。