Fundman睇市：滙控現價估值唔算貴

周二，恒指跌69點，報23,484點。俗語話狡兔三窟，股市小兔果然蠱惑難猜，前日紅盤低收後，第二個交易日指數依然未搵到支持，最難搞係全日指數顯示牌幾次紅黑互換，無論好友淡友都唔易做。尋日現貨收市後，期指繼續浸浸落，低水幅度由周一的38點，擴大到93點，看來好友都唔想在A股復市日，揸太重倉底過夜。

收市後，人行又一次「出其不意」加存貸息各四分之一厘。市場會唔會視為壞消息出晒，掉番轉頭向上炒？客觀睇，中港兩地股市估值之低，查實足以反映內地通脹高峰去到7至8%的風險，由去年十一月開始驚加息驚到今時今日的股市，絕對有條件趁消息明朗化先來個死貓彈。

然而，日前同一位內地資源股分析員寒暄後，筆者信心有啲動搖，朋友話過去幾日春節假期，傳統上內地農作物價格會相對穩定，但今年情況卻相當反常，除白米外，幾乎所有農作物價格都好似坐火箭一樣，有上無落，恐怕中央為穩定物價，春節後壓抑流動性的措施會比市場估計規模更大、力度更猛咁話。

講番港股，近期確實無焦點，前日提過業績前夕有炒落後條件的思捷（00330）及宏利（00945）繼續做好，分別再升0.7%及1.3%。自中海油（00883）發表產能增長目標之後，分析員紛紛睇淡其未來幾年的業績增幅，股價昨收16.9元，是去年十一月底以來最低，中石油（00857）及中石化（00386）卻見做好，不過，睇資金流向似乎係對沖基金的pair trade，即沽空中海油，買中石油及中石化賺spread的操作。如果係普羅散戶賭單邊的，後面兩隻又似乎唔係真係咁抵買，若然今日先至上車，恐有追寶尾之嫌。

季報加強透明度

反而滙控（00005）唔經唔覺，連升四日上番五十二周高位，見88.8元，認真好意頭！有外電報道話滙控同萊斯銀行有意開始公布季度財務報表，並且有機會在一年之內成事。

對一間市值1.5萬億港元的巨無霸來說，只公布六及十二月結的業績，也實在太過唔合潮流，尤其經歷金融海嘯之後，唔少人意識到這類「大得不能倒」的巨型金融機構，資產負債表的透明度，原來唔係想像中咁高，能夠增加春秋兩季的季結數據，肯定係歐洲銀行透明度改革邁出一大步，亦係一眾投資者之福。

講番滙控強勢，近期查實係無乜特別利好消息支持，但指數重磅股裏面，驚通脹驚加息驚壞帳上升，內銀股無運行，尋日全部試緊低位；中資電訊股推3G互撼到頭崩額裂炒唔起；中海油瓜埋；地產股又受政府放風話要推地皮主動拍賣，齊齊行路打倒褪，揀無可揀之下，先輪到滙控發威。

芬佬仍然有戒心

由街上分析員預測數字，滙控估值唔算貴，彭博綜合大行預測，一○及一一年分別賺141.5億及183.2億美元，回到○七年高峰期191.3億美元的九成五水平，一一年市盈率11.4倍，都算幾吸引。不過話說回頭，經歷金融海嘯，唔少分析員對這類大型跨國銀行有幾多問題掃咗落地氈底，冇响資產負債表上反映出來，都抱一定戒心，單係睇一一年的預測盈利，最高及最低分別係296億及132.7億美元，差距之大，可見一二。月底滙控會出全年業績，史提芬相信，管理層會否作調升派息的預告，或者披露更多返中國A股國際板上市的計劃，對股價中長線影響力更大。