股海實戰：中交建細細注博反彈

市場傳出特區政府擬再推措施壓抑樓市炒風，尋日恒指走勢持續偏軟，全日波幅220點，收報23,484點，跌69點，大市成交略為回升至737億元。執筆期間傳來人行宣布加息四分之一厘，且看今日內地股市如何反應。

嚟緊周四及周五，內地將會公布一月份貿易和新增貸款數據，投行估計內地一月份通脹達5.2%，可見人行加息係遲早問題，對於尋日傳來人行加息嘅消息，阿莊不感意外。至於加息陰霾消除後，股市係升係跌，阿莊則樂做事後孔明，暫會以靜制動，等待明確方向出現再謀定而後動。

香港方面，雖然去年下半年特區政府曾針對樓市炒風出招，樓市交投隨即靜咗落嚟，但唔使兩個月炒家又再活躍起來，市區熱炒屋苑二手樓成交顯著回升，內地客亦趁春節南下掃貨，好似當政府冇到！

在通脹當前之下，衣、食、住、行樣樣皆升，但若然樓價炒風進一步熾熱，咁落去遲早出大問題，所以若然政府坐言起行，真係決心增加樓市供應，對大眾利益應該係有利冇害，當然，呢個說法嘅大前提係政府出招目的只有一個，就係壓抑炒風，而唔係推冚樓市！

受相關消息影響，尋日地產股表現回軟，三大龍頭新地（00016）、長實（00001）及恒地（00012）股價跌幅介乎2至3%，但美聯（01200）表現相對靠穩，收報6.5元，跌0.3%。

本來，呢期好友挾淡倉，都係從地產股入手居多，如今地產股蒙上政策陰影，即使大笨象（00005）靠穩，反彈力度亦有限，故嚟緊好友行動難度增加。講開又講，尋日大笨象股價創五十二周新高89.25元，收報88.8元，升0.91%。權益披露資料顯示，有獨立董事增持，大行亦重申睇好，相信業績前可繼續擔當「定海神針」嘅角色！

內地基建股有「錢」途

股海風雨飄搖，要選防守性股份，除咗春節前阿莊買入嘅港鐵（00066）之外，內地基建股亦係比較穩陣嘅股類，皆因如今內地靠不斷花費公帑大興土木，以刺激內需，特別係如今通脹已成全社會焦點，透過讓股市及樓市兩大資產市場上升，產生資產增值效益來刺激消費嘅招數經已行唔通，商業銀行今年嘅新增貸款又幾可肯定不及往年，咁嘅情況之下，政府只有繼續開大水喉，透過大興土木撐住大局，否則說要繼續以刺激內需推動經濟增長，只會流於一堆廢話！

中交建（01800）股價自去年十月高位7.95元，反覆回落至上月底低位6.19元，調整幅度達22%，故見短線已出現超賣下嘅反彈浪，昨日收市報6.46元，逆市升2.2%，成交1.56億元。理論上，去年五月低位6元關不容有失，睇實呢個位細細注跟勢博反彈未嘗不可。

戰報

新意網（08008）

Sammi本周一吼中新意網，當日低位只係1元，轉眼間尋日已升至1.13元高位，跟佢上車走番轉就賺13%。

中國自動化（00569）

中國自動化尋日表現亮麗，高見6.95元，錢進早於上月十七日就介紹畀大家，以當日低位6.23元計，升超過11%。