太子手記:馬化騰石澳大屋設計曝光
有「QQ之父」之稱嘅騰訊(00700)主席馬化騰,喺○九年底以平咗當時本港獨立洋房成交價新高紀錄嘅4.8億元,買入石澳大浪灣道13號,成為首個「紅色企業家」進駐石澳,佢買咗個物業後就籌劃重建1幢超級豪宅,太子收到風,馬化騰向政府提建議,要求興建1幢4層高包括1層地庫嘅歐式設計大屋,大屋樓面超過1.9萬方呎。
馬化騰早前以呎價超過2.4萬元向華光船務趙世光買入上述大浪灣道地皮,根據太子啱啱收到嘅資料,佢嘅dream house設計相當豪華,其中樓底極高嘅大門頂部配以圓拱形設計,極具超級豪宅氣派。
大屋面積近2萬方呎
整間大屋樓面超過1.95萬方呎,單單地下面積就有7,836方呎,除咗必備嘅巨型客廳和獨立大飯廳外,廚房都有兩個,其中一個屬中式廚房,至於主人套房就位於二樓,備有大型衣帽間,而從房間嘅大露台外望,可以見到大屋嘅私家游泳池。
佔地廣逾14萬方呎嘅私家花園設計更見心思,並加入不少水景裝飾,其中沿私家車路設有蜿蜒嘅水景裝飾。
騰訊業務漸露曙光
騰訊舊年比較黑,個股價試過五日跌咗近兩成。最打擊佢哋嘅係網絡遊戲行業經營環境轉變。
今年開始就嚟個大U Turn,成立「騰訊產業共贏基金」、收購美國網絡遊戲開發商Riot Games、又傳出同美國團購企業Groupon合作,唔怪之個價好快上番200蚊,尋日稍為跌番落193.8元,高盛出咗報告,話最新目標價升至185元,但唔夠尋日個價高。
馬化騰將重建大浪灣道十三號大宅,住用面積近二萬方呎。
大浪灣道十三號大宅