Vodafone股東踢走龐約翰

滙控（00005）前主席龐約翰喺○六年離職後冇耐，變身做咗全球最大流動電訊商Vodafone主席，但係近年面對唔少股東反對聲音，公司董事局舊年初開始搵人頂龐約翰個位，接班人原來就係飛利浦現任舵手柯慈雷。

部分Vodafone股東一直都唔like龐約翰，舊年七月嘅股東會上更加有股東對佢連任主席嘅議案投反對票，話喺佢領導下，Vodafone嘅收購紀錄簡直可以用「災難」來形容。Vodafone舊年五月宣布，要為收購得來嘅印度業務作出23億英鎊（約290億港元）減值。

前飛利浦舵手接任

柯慈雷下個月就會卸任飛利浦舵手職務，今年七月份嘅股東會後接替龐約翰出任主席。柯慈雷喺○一、○二年經濟低潮期臨危受命成為舵手，當年飛利浦仲蝕緊錢。喺佢帶領之下，飛利浦之後成功重組，賣晒啲佢哋認為唔值做落去嘅業務，最後分部業務由八個縮到三個，結果飛利浦除○八年之外，○三年以來年年賺錢。