墨國首富投資跑贏股神

墨西哥首富斯利姆（Carlos Slim）舊年壓倒股神巴菲特同埋蓋茨，登上《福布斯》全球富豪榜首，原來佢嘅持股伎倆亦勝二人一籌。據彭博社資料，斯利姆揸住嘅上市公司市值去年大升37%至700億美元，皆因揸重自己旗下嘅墨西哥公司，令佢嘅股壇戰績連續第二年贏巴菲特同埋蓋茨呢兩位勁敵，睇嚟今年全球首富寶座「坐定粒六」。

長揸Grupo Carso飆近倍

斯利姆揸重貨嘅墨西哥手機營運商America Movil，上年市值升咗15%至489億美元，呢隻都未算最勁，最標青嘅係佢揸得最耐嘅旗下綜合企業集團Grupo Carso，市值一年間飆升近一倍，最差係紐約時報，市值縮水21%。

睇吓股神，即使巴郡市值升咗22%，都帶挈唔到巴菲特追上斯利姆；蓋茨仲慘，微軟市值跌咗8.4%，係呢位創辦人持股裏面表現最差，搞到上年持股組合回報縮水。

美國大學商學院金融系教授馬丁話，墨西哥股市風險比美股高好多，經風險調整後，巴菲特持股市值隨時勁過斯利姆，巴郡股價喺好景時升幅不大，但逆境抗跌力強。