股海實戰：港鐵進可攻退可守

受港股利淡氣氛影響，本來擬成為兔年第一新股嘅宏橋暫時擱置上市計劃。照咁睇嚟，首季頭一個月市況未必會如想像般好。不過，阿莊始終覺得，市場消化內地通脹及加息預期已有一段日子，除非外圍股市再現大幅動盪，否則三月業績期仍有機會追回失地，資金流向將成為關鍵。

近日遭大戶洗倉嘅中海油（00883），宣布斥資12.67億美元收購美國能源公司頁岩油氣項目33.3%權益，正面回應投行對公司長期油儲量的憂慮，加上超賣後引發技術性反彈，適逢布蘭特原油升穿每桶100美元大關，刺激買家進場掃高石油股，故見尋日中海油股價升逾2%，收報17.66元，但以圖論股，若反彈未能重上18.4元，股價仍有機會下試16元支持，現水平一動不如一靜。

細價股方面，呢幾日意馬國際（00585）枕住大成交，尋日朝早一度抽上0.425元，散戶見人頭湧湧小注跟進，誰知隻股突然中途拉閘，午後復牌通告披露正考慮其擴展計劃嘅可選方案，並已就動畫行業嘅若干未來項目與多個潛在業務合作夥伴進行後期磋商，以拓展其業務範圍，惟尚未就任何項目訂立任何協議。

唔知係唔係班炒家見中空寶，所以復牌後即刻掉頭沽，結果隻股一度由升28%變為倒跌3%，收報0.335元，升1.5%，成交高達2.22億元，真係要食定驚風散先好上車！

阿莊手持嘅中國燃氣（00384）尋日復牌，見有跳車機會，大清早毫不猶豫以平均價2.95元止蝕離場，呢項投資虧損率達27%，大拿拿唔見11萬銀，都咪話唔肉痛！但阿莊自問，今次隻股出現嘅問題好突然，哪會想到好端端１隻基金股會變成如此下場，最重要係到呢一刻為止，依然難以準確判斷事態發展對公司實際影響有多大，故阿莊仍慶幸今次還有「逃生」機會，惟有抱住輸少當贏嘅心態，年尾為持倉去蕪存菁，迎接新歲！

上蓋物業易升難跌

所謂「送舊迎新」，為迎接兔年來臨，阿莊尋日呢頭沽咗隻中燃，套現29.2萬元，嗰頭就入場買咗2萬股港鐵（00066），平均價28.75元。

買入港鐵，主要考慮係今年香港「衣、食、住、行」樣樣都加，喺通脹嘅大前提之下，針對呢幾樣必需品行業發掘優質股嘅策略唔會有錯。港鐵有「可加可減機制」作為護身符，可以因應通脹環境提出加價申請，加上旗下鐵路及收租物業收益非常穩定，有助增加防守性；至於鐵路上蓋物業發展業務，阿莊深信，在通脹環境之下，磚頭易升難跌。橫睇豎睇，隻股可攻可守，正所謂「平安是福」，順祝各位讀者新春大吉，身體健康，股運亨通！

戰報

昂納光通信（00877）

錢進於一月二十八日講昂納光通信會止跌會升，果然走勢一如所料，只是兩日光景，股價便升超過8%。

中國海澱（00256）

志強昨日才話中國海澱反彈值博，又有息收，股價昨日繼續做好，高位計算單日賺近6%。