瑞信薦利是股 睇升三成六

農曆新年對於小朋友嚟講，最開心嘅莫過於着住新衫去(逗)利是，咁大家會點樣運用呢筆利是錢呢？儲起嚟慢慢搣，定係捐去幫助有需要嘅人？除此之外，仲有一個選擇，就係參考吓瑞信嘅報告，將利是錢買佢哋貼嘅「利是股」。

佢哋揀咗8隻股票畀大家參考，當中包括匹克體育（01968）、創維數碼（00751）、耀萊（00970）、佳兆業（01638）及美聯（01200），仲估計未來十二個月呢批股份股價有36%累計升幅。

瑞信話佢哋虎年推介嘅利是股表現跑贏恒指3%，今年佢哋預計呢啲利是股升幅超過三成咁多。太子都要學吓證監會，做吓啲溫馨提示，投資前多做功課，唔好齋聽人哋講，咁至係精明投資者。

看好匹克增長潛力

瑞信仲分析話兔仔係敏捷、聰明同埋好識避險嘅動物，喺過去幾個兔年，除咗「八七股災」之外，其他嘅年份都係升市，所以瑞信相信今年股市都會有正面回報。尤其睇好本港同內地一啲中小型股嘅表現，就好似匹克咁，隨着二、三線城市嘅消費力逐漸增加，相信呢隻股嘅增長潛力大。