地產代理 春節開單倍賞

政府去年底出招壓樓市，近兩個月樓市卻丁財兩旺，摑咗政府一大巴掌。依家個勢冇停止迹象，地產代理老闆，仲唔趁勢再搞旺佢？佢哋將谷行啲前線，喺新正頭多做生意，想攞「開單利是」就加把勁喇！

美聯初一成交封「金牛」

太子尋日喺美聯（01200）度收到消息，話前線經紀只要把握市場機會，就有「搵銀」嘅機會。個規則係咁嘅：大年初一促成住宅買賣成交經紀，大派每宗交易1,000元大利是，促成租務交投經紀有500元利是。連埋原本應有嘅佣金，都幾和味o架。

美聯喺今年初一、初二都有超過100間分行營業，初三就會全線啟市；除咗頭先講嘅「開單利是」之外，初一、初二提早開工的經紀，會獲公司派發50元特大開工利是。同系香港置業於初一至初三，則向促成每宗買賣及租務成交經紀，派發800元大利是。

另一家大行雖然全線分行於初一休市，但都會向初一至初四期間，促成工商舖、住宅、車位買賣及租務成交的前線代理，派發每宗500元利是作獎賞，該公司初二下午起將有逾百間分行啟市，初五先全線啟市。至於同系嘅另一家地產代理，亦喺初一至初三向所有促成交易經紀，大派500元利是。