Fundman睇市：澳優乳業捧場先睇業績

近期個市都算古靈精怪，美股強A股弱嘅時候，恒指揀跟A股，到A股見底，道指開始冧檔，港股又轉去陪山姆叔叔玩「SIR」滑梯。港股昨日最多跌過332點，中段多少受滬綜指強勢影響，跌幅收窄，但最後收市都要跌169點，報23,447點。現貨收市後，期指最後十五分鐘跳低近百點收，低水76點，可見即市博大霧的大戶，對後市都唔係太有信心，始終埃及局勢充滿變數，美股近幾個月累積升幅又唔細，隨時來個借勢調整。

不過，滬綜指能夠在新一輪打壓樓市政策出台，以及預期人行春節加息的兩大負面因素下，仍可收復2,750點阻力，反映內地股市開始對壞消息產生抵抗力，對去年十一月開始轉弱的中資股而言是正面訊號，不妨趁虎去兔來為投資組合換新裝，即使股市未見底，但離底料不遠矣。

毒奶粉事件之後，過去年多時間，內地奶粉股一窩蜂來港上市，可惜澳優（01717）、環球乳業（01007）及雅士利（01230）等表現，都令筆者以至唔少捧場客失望。先講澳優，股價幾近由去年年頭跌到年尾，由去年初的6.85元碌到去早前低見2.5元，高位唔見咗三分之二，認為內需股必賺的，被打了響亮的一巴掌。至於環球乳業及雅士利，去年十月和十一月掛牌以來，亦可以話係無段好睇，如果IPO認購後揸到今日，分別輸咗43%及36%，話叻過澳優，只係五十步笑百步。

唔知看官有無留意新聞，近期內地同胞南下搶購奶粉成風。事實上，自三聚氰氨及大頭奶粉事件後，內地消費者對國產奶粉信心大失，情願託朋友在香港買，也不幫襯內地貨。而以上幾間上市奶粉公司集資的用途，不是為了自設牧場穩定奶源質素，就是為品牌推廣宣傳投入銀彈，以挽回內地消費者信心。

積極回購撐股價

可能眼見股價過分低殘，澳優於一月曾進行十三次回購，行動看來暫時收效，至少股價已止跌，亦引起筆者的興趣。

澳優主要向澳洲乳品供應商Tatura進口奶粉原料，進行混合、殺菌、淨化及包裝等工序後，以本身品牌推售。筆者為研究幾隻奶粉股，有一段時間特別留意內地家長討論區，有趣的是，原來唔少消費者以為澳優是國外品牌，相信這種誤會對品牌有好有壞，好的是淘寶網上，其高檔奶粉售價甚至比部分外國品牌更高，但壞處可能是當上市知名度高了，更多人認知公司的品牌歷史及產品供應鏈，會認為公司非「來路貨」而反感。

澳優○九年底上市，過了蜜月期的第一份中期業績，確係有點趕客，一○年上半年銷售額跌8.2%至2.95億元（人民幣．下同），純利跌8.5%至5,965萬元。新股上市走樣屢見不鮮，事實係唔少公司在上市前一段時間都有過分「催谷」，隨後無以為繼。澳優上市前，銷售額由○六年的9,372萬元急增至○九年的6.23億元，但奇怪的是，中期業績卻沒有為此解釋半句。

估值屬同業最高

業績中銷售微跌，可是同期銷售費用大升68%，存貨升61%，這令人想到上市似乎無幫到澳優，反而有點問題出現。而且資產負債表內也多了一筆2億元的金融項目，來自上市後買下的湖南省高速公路建設開發總公司債務。

看到這裏，筆者儘管欣賞回購支持股價的舉動，澳優也試過中期業績普通，下半年一次過追番晒的壯舉，可是真金白銀買落去，筆者仲係有點顧慮，還是睇多一兩份業績至算，尤其是估值，一○年度計，澳優可能是3隻奶粉股中最高。