股海實戰：上海實業靜待買貨時機

埃及局勢動盪，美股上周五顯著低收，亞太區股市昨日亦普遍低開，恒指一度下跌331點，好在滬綜指止跌回升，收報2,790點，升37點，恒指亦順勢收窄跌幅，埋單唔見169點，報23,447點。大市成交688億元。

不過，二月份期指喺現貨收市後急挫，收報23,371點，低水達76點，係咪預示短期會再有咩壞消息出現？阿莊就估計，今日係內地A股春節假期前最後一個交易日，收市後人行有機會宣布加息，以圖透過長假淡化加息嘅負面心理影響，是否如此，好快就有答案！

中央一號文件出爐，今年嘅焦點係「治水」，水利股應聲上揚，天業節水（00840）升14%、中國水務（00855）升2.78%、北控水務（00371）升1.3%。面對近年全國旱災及洪水四起，今次中央政府決心搞好水利，未來十年水利投資將達到4萬億元人民幣，一來可以進一步打好農業嘅基礎，二來亦可以透過大量投資農村基建，收窄城鄉差距。喺咁多隻水務股之中，阿莊都係屬意有大紅籌作為後盾嘅北控水務。

早前阿莊預期一號文件會集中講三農政策，故一早已坐定隻第一拖拉機（00038），誰知今次揭盅焦點放喺水利，雖然仍屬於農業範疇，但點都有啲偏差，如今睇嚟確有大戶聞風先動，一拖股價自上月中旬開始失守50日線8.5元支持，一直走低，昨日曾低見7.32元，都咪話唔心痛。石油板塊人氣較盛，但表現卻個別發展，中海油（00883）繼續受壓，跌至全日低位16.82元後，才吸引買盤趁低吸納，跌幅才收窄至0.69%；中石油（00857）及中石化（00386）股價則未受影響，分別上升3%及2.8%。

金礦股彈力料有限

金價連跌多天後終現反彈，金礦股亦有喘息機會，招金礦業（01818）、瑞金（00246）、靈寶黃金（03330）升幅介乎1.7至3.2%。不過，阿莊認為，金價尚未跌定，別對金礦股反彈勢頭存過高期望。

內地針對房地產市場嘅調控措施不絕，內房股表現受到限制。不過，阿莊認為，經歷過去年嘅調整，內房股估值已回落至一個相對合理嘅水平，即使仍受政策影響，股價冇升幅但仍會有一定嘅波幅，能夠掌握到箇中規律，一樣可以從波幅中找到賺錢機會。

好似上海實業（00363），阿莊唔只一次過講，呢隻股已將業務焦點投放喺房地產業務，隨着上海經濟騰飛，上實作為上海市在港嘅窗口公司，搞上海市內房地產業務可謂事半功倍，最近股價又再回落至大型波幅區底部區域，若短線人行真係加息，內房股有機會再發軟蹄，上實股價一旦再試去年低位28至29元水平，可把握機會伸出友誼之手接貨，實行年頭播種，年尾收成！

戰報

國中控股（00202）

姚午齊於一月十八日推介國中控股，走勢唔弱，昨日高位1.32元，若跟進買入都有近7%的進帳，果然好眼光。

中海化學（03983）

錢進於一月十七日睇好隻中海化學，話有勢再上，結果在近日如斯市況下，仍上升4%，算有交代。