政府出招遏炒非誠勿擾

今個禮拜樓市已經進入「收爐」階段，成交量冇月初嗰陣咁旺，亦都係意料中事。Paul少相信，過咗新年之後，先至係樓市嘅「決戰時刻」，新盤大舉推出，成績如何？市場購買力究竟見咗底未？呢啲都會喺二、三月開始先至有啲眉目。

最近有研究指出，按樓價中位數同埋家庭入息計算，香港樓價冠絕全球，但同時間，亦都有好多研究報告會話畀你知，本港樓市仍然好健康。

其實，個世界咁大，每個地區嘅生活環境唔同，對「資產」同埋「家」嘅觀念亦好唔同，所以根本好難去直接比較，邊度係世界之最？計嚟都冇乜意思。

樓價料再漲兩成

今年毫無疑問係通脹年，資產價格升值，物業自然係其中之一，所以近期好多經濟預測同分析，都估計樓價仍然可以有一成半至兩成嘅升幅。

至於驚唔驚今年個市會「爆煲」？有位老行尊就同Paul少講：「真係冇驚過，依家香港個市，真係有啲內地樓市嘅影子，即係三幾個月就有一次半次所謂嘅「壓抑炒樓」措施出現。班高官已經『調控樓市』成癮，所以，當有乜『大凶兆』前，佢哋已經率先做咗嘢，起碼都托住個市先，保住個金融體系嘛。」

高官心態「打份工」

Paul少覺得，佢有啲都講得幾啱。過去一年，政府唔單止多次出手調控樓市，而且手段係一次比一次直接。香港政府打住「民生」嘅旗號，其實已經逐步擺脫咗「干預市場，罪犯滔天」嘅「詛咒」，根本完全唔會再驚市場點話佢，但係，講到政府會唔會到樓市逆轉時「托住個市」，Paul少就真係有啲保留，大家亦最好唔好有咁嘅「個人主觀願望」。呢班高官，其實個個心態都係「打份工啫！」何來會全盤大局咁去考慮樓市政策呢？

老行尊嘅意見啱唔啱都好，但按依家樓價嘅升勢，小市民「追唔到車嚟上」嘅情況會愈嚟愈普遍。當怨聲四起嘅時候，政府一定又會「做啲嘢」去博攞分，所以今年再「出招」調控樓市嘅機會，其實都好大。Paul少只係期望佢哋出招前真係諗清楚，如果唔係真心想令樓市發展健康啲，就寧願「一動不如一靜」，無謂騷擾市場之餘，亦都見唔到成效，電影都有得睇喇，「非誠勿擾」嘛。