太子手記：黃瑋傑回味人生第一股
「書中自有黃金屋。」最近輝立證券董事黃瑋傑出咗本《股市是平的》嘅新書，太子當然有捧場喇。唔講唔知，少年時代嘅黃瑋傑為咗買股票，足足幫人補習咗三年，然後再加埋多年儲落嘅利是錢，終於喺十六歲嗰年買下人生中嘅第一隻股票。
感慨股評人唔易做
講講吓，黃瑋傑又突然有感而發，直言「股評人唔易做」。佢笑言自己係「黃師傅」，而唔係「黃大仙」。有時候股民會「選擇性失聰」或者「聽啲唔聽啲」，最後輸錢反而怪責股評人嘅眼光唔準，其實唔多公平。佢亦提醒股評人要有認錯嘅勇氣，更要將投資者嘅利益置於個人榮辱之上。
另外，至於新書點解叫做《股市是平的》？黃瑋傑就解釋，喺金融市場全球化背景下，投資者嘅投資眼光唔可以再局限喺香港，所以書中內容會帶領讀者突破思想框框，探索全球化之下嘅各類投資機會，當然亦唔少得揀股法則、實戰策略，以及其他有用分析工具資料喇。