市場徐想：騰訊 保持增長動力
根據中國網際網絡資訊中心最近公布數據顯示，中國嘅網民人數截至去年年底，已經升到接近4.6億，比○九年增加超過7,000萬。中央已經銳意推出一系列政策，將網際網絡普及率由目前嘅34%進一步向上推高。
喺呢個大趨勢下，騰訊（00700）最近公布將會斥資50億元人民幣，成立騰訊產業共贏基金。呢筆資金主要會用喺物色網絡遊戲、社交網絡、無線互聯網、電子商務同新媒體等產業嘅投資機會。騰訊管理層亦意識到企業將來嘅發展亦都要與時並進先得，相信共贏基金，可以為企業帶來新嘅盈利增長動力。
此外，手機網絡嘅強勁增長，亦有望為騰訊業務帶嚟一個新發展浪潮。據講，內地手機網民人數最近已增加到超過3億，相信呢個咁強勁嘅增長可以維持一段時間。憑住擁有目前龐大嘅用戶網絡，騰訊要喺手機網絡續領風騷，可以話係毫無懸念，相信佢嘅相關業務未來幾年將可繼續大放異彩。