短炒倉：重慶機電 短線睇3元
近日一眾機械設備股都有不俗表現，尋日經緯紡機（00350）更急升6%，表現搶鏡。至於重慶機電（02722）亦唔失禮，升4.3%報收。
重機為內地西部最大綜合製造企業，旗下四大業務，包括商用車輛零件、電力設備、通用機械及數控機床。由於機械設備行業係「十二五」七大新興產業之一，加上國家全力推動西部大開發，重機盡得天時地利。重機上半年盈利3.45億元人民幣，升60%，每股盈利9分人民幣。股價自去年十二月初創出3.3元高位後，持續調整，本周三最低曾見2.43元，但隨即作出反彈，昨日進一步回升，收報2.69元，似已成功尋底。
按全年每股盈利20分人民幣計，重機現價預測市盈率僅約為11.2倍，以國策股而言，實屬偏低，就算上番前高位3.3元，PE亦只係十四倍左右，中線重返其上問題不大，短線先睇3元，止蝕2.4元。
