股海實戰：安踏體育已屆買貨水平

近日豪門爭產情節峰迴路轉，較沉悶嘅金魚缸精彩得多。雖然尋日大市成交近700億元，但論板塊焦點唔多，港口航運股獲大行唱好，表現較佳，內銀及內房股就繼續受調控政策影響。講到內房內銀，阿莊都係嗰句：莫買當頭跌，目前尚未到撈底嘅時候。

個別基金股繼續被洗倉，霸王集團（01338）股價跌穿招股價2.38元後，跌勢仍然未止，尋日一度跌至2.09元，收報2.13元，跌幅6.99%，成交8,185萬元。技術上，隻股已落入超賣區，短線2元邊或者會有些少反彈，只係其銷售情況未及預期，已引起投行高度關注，班大戶啱啱清倉走人，冇咁快就買番，咁多股好揀，都係無謂火中取栗，免得失手難以「逃生」！

呢幾日金魚缸冇咩好炒，阿莊跟股友無無聊留意咗隻中天國際（02379）。隻股早前宣布1供10，每股供0.03元，上周三除權前股價為1.71元，除淨價0.183元，其後股價大幅波動。

更奇怪嘅係，該股喺本周三停牌，尋日復牌通告披露指供股建議未獲通過，故已失效。換言之，公司供股唔成事，偏偏股價未見大回，尋日曾高見1.8元，收報1.36元，升18%，較除淨價更高出6.4倍之巨！

如今隻股經已除權，原先計劃供款0.3元經已反映喺除淨價，即使供股唔成，當股份拆細咗，但點樣處理嗰0.3元嘅價值？

中天供股考起炒家

不過，阿莊炒咁耐股票，鮮有遇到咁嘅個案，總結睇法係隻股實在好乾身，舞高弄低才能如入無人之境，呢啲情況只有繼續做旁觀者學嘢！

聯想（00992）落實與日本NEC合組公司拓展日本個人電腦業務，如今幾家龍頭企業競爭激烈，任何可以進一步鞏固地位嘅機會都唔會放過，故阿莊認為今次舉措策略意義會較大。

下周四就係大年初一，依家係內地消費市道嘅高峰期，阿莊仲好記得，舊年新年見到來自深圳嘅友人着住某內地名牌體育服套裝，阿莊見到用料一般，但喺香港炒呢隻體育用品股炒得多，卻未曾買過其產品，所以多口問句價錢，原來一套要成千蚊人仔，新年前喺深圳二線城市百貨公司購買，仲要搶到先有咁話！

睇今年內地春節消費市道暢旺，難怪見到近日體育服裝股股價蓄勢反攻，尋日李寧（02331）股價升5.6%，收報15.3元；安踏體育（02020）升2.09%，報12.68元。

安踏股價已較去年十月高位回落咗三成有多，現價計預測市盈率約二十倍，息率3厘，論估值呢啲位持貨可以話揸得舒服好多，只係考慮到股價大幅調整過後，整固需要時間，建議策略喺12元邊或以下收集，升近14元獲利。

戰報

長江生命

（00775）

積奇周二話可投機跟進長江生命，眼光獨到，昨日升至0.63元高位，較其推介當日低位有12.5%升幅。

TCL通訊

（02618）

史提芬於一月二十日話TCL通訊坐九望十，股份其後發盈喜，昨日更見過9元，跟進買入目前已穩賺12%。