上實周杰唔怕港紙貶值
早兩日太子傳媒老友同上實（00363）管理層食飯，講開依家百物騰貴，都係揸住啲升緊值嘅人仔最安心，呢個時候佢哋嘅常務副行政總裁周杰好大反應咁話，佢以○二年由上海調嚟香港做嘢時，大概係80幾蚊港紙兌100蚊人仔，今時唔同往日，家陣人仔升咗咁多，要成一百一十幾港紙先換到一百蚊人仔，等於人工變相少咗。不過，佢笑笑口話好彩年年都有人工加，都追到通脹，今年亦都唔例外。
佢哋嘅發言人馮啟明都話，依家為咗保值，佢已向自己儲開錢嘅銀行設定指令，一有港幣入帳就會隨時自動兌換成人民幣，咁就無有怕港幣貶值啦。