內地買iPhone要抵得冷
iPhone喺內地炒到成萬銀一部，就知道內地好多「蘋果手機迷」，不惜千金都要買到蘋果公司嘅產品。聽北京朋友話，買蘋果公司產品唔單止要有錢，仲要「排長龍」，而且內地嘅蘋果公司零售商店真係「插針都插唔入」，就算呢排天寒地凍，舖頭未開門之前都已經有人排緊隊。
專門店丁財兩旺
內地有四間蘋果公司零售專門店，兩間喺北京，兩間喺上海，每間都成日人頭湧湧。
大家好想知呢四間舖頭賺幾多，雖然蘋果公司冇公布全球每間零售商店嘅收入，但財務總監奧本海默早前就好自豪咁講，喺中國嘅蘋果專門店，平均嚟講係全球最多人流同最高收入店舖。
蘋果公司今年計劃全球加開50間零售商店，營運總監庫克話，一二年前喺中國開設最多25家分店。