股海實戰：中航科工注資再發功

美國總統奧巴馬發表國情咨文，指過去兩年美國經濟經歷咗有史以來最嚴重嘅經濟衰退，但如今股市已開始回暖，企業盈利開始復甦，經濟開始進一步增長。一一年最出人意表嘅，會唔會就係美國經濟同美匯表現，阿莊自問都未係好睇得通透，就連掌管香港外匯儲備嘅金管局一把手都話，今年投資要「步步為營」﹗

恒指尋日曾回落至23,662點，收報23,843點，升54點，從部分基金股被洗倉嘅情況可見，有啲似係托住指數散貨嘅迹象。繼內地汽車、公路、消費、食品股之後，尋日遭洗倉嘅有波司登（03998）同東岳集團（00189）。

藍籌股方面，騰訊（00700）繼續成為焦點，除了成立產業基金嘅消息外，尋日又傳來與日本最大社交網站Gree Inc組企業聯盟，主攻流動電話社交遊戲平台，可惜股價未能突破高位205.8元，以勢論股，騰訊喺170至180元水平建立一個支持區，三月中旬業績前後守此區域，股價可保持反覆向上。

中證監近日就QFII參與股指期貨交易指引向社會徵求意見，睇怕搞得嚟又要一年半載，況且初期當局將對涉及嘅交易類型及規模等細節作出一定嘅限制，所以唔好期望過高。

講到內地股指期貨，查實中國富強（00290）早喺○八年底已經講話有意收購一家喺內地從事期貨合約買賣嘅經紀服務公司49%權益，但至今尚未見有下文，交易限期已延至今年六月底，相信亦係同內地對外資入股期貨公司嘅條例限制有關。

中國富強值得期待

反而，中國富強另一重大發展，乃上月宣布獲中國信達（香港）認購相等於經擴大已發行股本嘅23.04%權益，每股作價0.2元，成為公司最大單一股東，日後中國富強的發展值得期待，可納入觀察名單。

阿莊組合中尚持有嘅中航科工（002357），前日又再傳來注資消息。今次公司擬向控股股東中航工業旗下中航機電悉數購入天津航空股權，代價約7.68億元人民幣。據講天津航空主要從事研發及製銷航空二次配電控制及防火裝置等產品，去年收入及稅後淨利潤分別為4.13億元及1.06億元人民幣。

睇到中航科工嘅業務去蕪存菁（近兩年積極清理虧損嘅汽車業務）後，如今專注做航空相關業務，且獲注入嘅項目係有盈利嘅優質資產。更何況，今次交易代價中，僅25%以現金支付，其餘按每股3.734元發行代價股份支付，公司毋須動用太多現金，以發公仔紙便能購入一項有利盈資產，且最終局面變相由母公司增持，消息相當正面。難怪尋日隻股一度踢上3.82元，收報3.79元，升4.12%，可繼續耐心持貨。

戰報

361度（01361）

體育用品股終於反彈，一早叫人趁低買的史提芬，於一月十七日推介361度，昨日高位較其推介低位有逾一成升幅。

金山軟件（03888）

錢進早前看好金山軟件，若於昨日高位食胡，較其低位買入價都有近一成水位。