趙國雄講業績無悶場
上市公司嘅業績會，主持人要宣讀一大堆與業績相關嘅會計數字，所以一般都會比較沉悶。不過，富有表演天分嘅趙國雄，就能將沉悶嘅業績會變得有聲有色。
話說尋日由長實（00001）分拆出嚟嘅置富產業信託（00778）舉行業績會，作為信託管理公司主席嘅趙國雄喺業績會開始之前經已搞吓氣氛，話會場內嘅小食及飲品已經畀晒錢，叫出席者快啲食唔好嘥。
有人問佢春節置富旗下商場有乜嘢推廣活動嘅時候，趙國雄突然停咗兩秒唔出聲，然後講笑咁話：「應該唔使我出嚟唱歌，我哋應該仲有Budget（預算）。」引嚟全場笑聲。
父女拍檔有默契
佢然後交個波畀個女Justina，即係置富資產管理副行政總裁趙宇去回答呢條問題。趙宇對於爸爸在業績會上搞Gag，都有向在場記者做個鬼臉，睇嚟佢哋兩父女拍住上，喺置富入面做得幾開心。
趙國雄（右）將置富業績會變得有聲有色，左為趙宇。