收樓不對辦內地更嚴重

過去一個禮拜，樓市繼續旺，大型屋苑嘅成交量，愈近年晚就愈有力，真係歷年少見。代理朋友話，近期嚟睇樓嘅客人，好多都係諗住「入市抗通脹」，希望盡快趁現價做業主，藉資產升值去抗衡通脹，至於係唔係應該「年尾收爐」，佢哋都已經唔多在意。Paul少預計，就算去到臨近兔年最後一星期，呢個旺勢應該可以保持得到。

不過，講到今個禮拜，樓市最多人談論嘅，始終都係有豪宅買家收樓覺得有問題，群起同發展商「講數」嘅事件。事實上，呢啲收樓搞到「一鑊粥」嘅事件，近十年喺地產界已經好少見；有人更加會誇張到話今次嘅事件，就等於係地產界嘅「導遊阿珍」事件；但其實，Paul少認為，兩者雖然都涉及消費者投訴同埋服務嘅問題，但始終唔能夠相提並論嘅。

早兩日，Paul少就同好耐冇見嘅馮總飲茶，暢談一下近年地產發展嘅環境。馮總未退休之前，係間中小型發展商嘅話事人；不過，經過九七金融風暴一役，佢掌舵間公司差啲「反艇」，雖然平安度過，但都元氣大傷，加上九七後地產業生態改變，所以佢哋亦再冇喺香港搞地產，轉為以「香港品牌」北上發展。

料無礙內地客入市

馮總話，呢次事件，竟然喺香港呢個發展成熟嘅地產市場裏面出現，真係幾「騎呢」。但佢話喺內地，呢啲事見得唔少，就算係一啲具知名度嘅內地發展商，都隨時有比呢次更嚴重嘅問題，而且有好多仲係曝咗光都無人會「補鑊」。

所以今次事件，應該唔會影響內地買家對整體香港新盤嘅觀感；而且，攞得大筆資金嚟香港買樓嘅人，亦都熟悉本港嘅名牌發展商，邊個口碑最好，邊個係「一分錢一分貨」，邊個又係「浪得虛名」，佢哋好多都心中有數，邊有咁易「上當」。

仲有最緊要一點就係：講到尾，「貨不對辦」、「造假」等等，一向都係佢哋嘅「拿手本領」，反而唔係我哋香港人嘅「強項」，香港人又點可以「班門弄斧」呢。

名牌發展商更有利

正如馮總所講，無論係內地人，定係本地人買新盤，大都會傾向幫襯嗰幾家出名嘅「香港品牌」發展商。所以，如果你問Paul少究竟呢單嘢對香港地產市場究竟有乜影響，Paul少會覺得，經過今次事件之後，中小型發展商賣樓，銷售方面愈嚟愈重本，要花費喺marketing，用料成本亦都高咗，變相減少佢哋嘅生存空間，咁就會令到香港嘅地產市場更加「歸邊」。照依家香港地產發展嘅趨勢去睇，大型發展商全面「統治」地產市場嘅日子，應該已經不遠矣。