太子手記：股神愛《華郵》一世唔賣

「股神」巴菲特與《華盛頓郵報》嘅關係可謂源遠流長，過去三十七年長期擔任該報董事，日里萬機嘅佢因擔心自己分身不暇，終決定喺五月任期屆滿後唔再續任，講明手持嘅《華盛頓郵報》股份一股都唔會賣，以示對呢份報章嘅熱愛從未退卻。

卸任董事 絕不減持

曾一度兼任19家企業董事嘅巴菲特解釋話，早幾年已經想卸下所有董事職務，當中最放唔低嘅就係《華盛頓郵報》，但由於其投資旗艦巴郡業務愈嚟愈複雜，所消耗嘅時間亦愈嚟愈多，終要作出選擇。美國證交會（SEC）資料顯示，巴郡截至去年底持有《華盛頓郵報》20.5%股權，係該報最大股東，持股現值約7.3億美元。

巴菲特咁重視《華盛頓郵報》，最大原因當然係因為佢年少時曾經做過呢份報章嘅「送報仔」，佢估計經自己手派送嘅《華盛頓郵報》多達50萬份，熱情至今退卻，故只要該報有任何需要，佢隨時都會出手襄助，更打趣咁話該報管理層可繼續徵詢其意見，但就可慳番筆7.5萬美元嘅董事薪酬喎。