股海實戰：王朝酒業估值高有道理

凱雷再次減持太保（02601），總值約138億元的股份昨日上板，故表面上大市成交雖增至812億元，但扣除太保上板股份的話，實際成交額不升反跌。

指數方面，恒指再次上試23,800點關不果，之後掉頭回落，收報23,527點，跌159點，期指低水10點。市況觀望，主要係午後內地A股跌勢加劇，滬綜指失守2,800點，投資者擔心嚟緊內地宣布最新經濟數據後，又有新政策出台，故入市態度審慎。

今日係一一年一月十一日，五條「一」日子挺特別。揀喺呢個日子上市嘅新股有森寶食品（01089），招股價0.68元。聽講首季尚會有多隻新股掛牌，較大型嘅包括內地第三大壽險公司新華人壽、民營企業宏橋鋁業、新世紀造船，以及有意捲土重來重啟上市計劃嘅華能新能源，若然班投行揀首季做大型IPO，照計嚟緊市況唔會差得去邊，且看本周預先反映內地數據表現後，農曆新年前市況會否有轉機。

上周四提及嘅MI能源（01555）持續升勢，昨日曾叩2元關，收報1.94元，升4.86%。此外，林業股兩儀（00094）（將易名為綠森集團）落實向大股東嘉漢林業購入新西蘭速生軟木項目，代價不多於2.88億元，會以發行代價股份支付。若交易順利完成，大股東持股量將由58.58%增至65.82%。

昨見兩儀股價創五十二周高位2.97元，收報2.93元，從交投可見此股相當乾身，而今次交易條款安排亦顯示大股東好惜貨，據講今次收購嘅項目可即時帶來強勁現金流，睇位播種，博年內見收成。

中資股方面，仲有三個星期左右就到農曆新年，又係中國酒品嘅銷售高峰期。昨見王朝酒業（00828）股價異動，高位做4.7元，收報4.67元，升4.24%，乃上月初以來首次重上50日線，且有大成交配合，可以另眼相看。

產能將增加四成

依家全球零售業，一聽到客人講普通話就笑逐顏開。王朝酒業主要從事製銷葡萄酒，隨着內地居民收入上升，且紅酒已成為高檔飲料嘅象徵，業務前景有可為。去年上半年公司純利同比增長18%，至1.14億元，截至去年六月底止手頭現金及等值約7.47億元，並無負債，財政狀況穩健。去年公司開始喺天津釀酒廠興建新產能，投產後年產能將增加40%至7萬噸，以配合市場需求。

雖然往績顯示王朝嘅業績一般係上半年優於下半年，但由於去年乃公司成立三十周年，宣傳攻勢有助下半年嘅銷售表現，故料全年度佳績可期。以現價計一○年預測市盈率二十九倍，由於增長前景樂觀、品牌優勢以及財務狀況穩健，足以讓公司享有較同業為高嘅估值，視為今年投資組合內地消費股核心選擇。

戰報

阿莊上周五指MI能源收齊貨等開車，昨日逆市創2元新高，以推介當日低位1.83元計，累計升幅超過9%。

錢進上周一推介紛美包裝時，低位只有5.15元，昨日逆市創5.76元新高，升幅近12%。