期指攻略：短期超買 可候低再揸

如果尋日錯過十點十五分前的一段衝鋒，真係可以提早放工，早段期指開23,387點之後，短短半個鐘，已經喊高去到23,590點才見停步，之後大部分時間只能夠在23,530至23,590點之間拉鋸。

小時圖上超買情況嚴重，以為連升五日的港股要停一停、抖一抖，但內地股市愈升愈有，下午市為港股注入新動力，好友順勢攻破上午的23,595點高位，不過都只係再推高75點！期指以23,670點作結，多少見到好友挾倉力度，已稍為收斂，大市成交都算配合升市，現貨有763億元易手。

短短六個交易日，期指由接近三個月低位22,321點挾到23,670點，這個雙底威力真係唔簡單，當然這要結合天時地利人和，一是大市成交唔多，沽壓有限，對好友反攻有利；其次，剛剛跨進一一年，傳統上春節前夕人行都會「放水」，令中港市場資金緊絀情況得以紓緩，再加埋外圍股市，整個第四季基調都牛氣沖天，中港股市只係扭轉背馳情況，來一次大規模修正。

前日23,160點揸的好倉，帳面利潤已過500點，若按筆者訂之短期目標23,580至23,630點，昨日可自行平倉套利，假如恒指一月份低位是周一的23,057點，以平均每月700至1,000點波幅，筆者估計後市挑戰24,050至24,100點的機會唔細，唯獨短期技術指標顯示超買頗嚴重，已平倉者，可以等機會在23,440至23,630點之間再買過。