股海實戰：理士新能源概念當炒

一一年首個交易日，內地A股及日本股市均來個「開門紅」，港股升勢找到附和，好友全力上攻，恒指全日高位見23,695點，收市報2,3668點，升232點，金魚缸人氣逐步恢復，大市成交回升至763億元。

昨日提及煤炭股有鑊氣，推介嘅兗煤（01171）真係上過26元，高位做26.2元，收市報25.3元，升3.05%，成交8.81億元，似模似樣。阿莊持有嘅煤炭股福山能源（00639）亦告上揚，曾高見5.93元，收報5.9元，升7.8%，成交5.44億元，呢隻股阿莊話走話走，如今依然持倉，短線關鍵在於能否以大成交突破6元關口。

指數向上，且交投復勇，中資股中，五礦資源（01208）及首長國際（00697）均現鑊氣，啱晒炒家胃口。

阿莊喺上月八日推介嘅志高控股（00449），一送九紅股已經除權，而發行紅股嘅建議亦已獲股東會通過，預期紅股將於下周二開始買賣，該股昨日收市報0.99元，跌1.98%，已較上月初推介時升咗五成有多，做其小股東真係笑到見牙唔見眼，只係現估值已相對合理化，嚟緊能否更上層樓，要視乎公司拓展市場及擴產嘅進度。

此外，按鐵道部嘅《中長期鐵路網規劃》，在「十二五」規劃期間，中國鐵建設嘅投資額，將保持喺每年約七千億元人民幣嘅水平，即五年合共達到三億五千萬元人民幣，較「十一五」規劃期間嘅總額明顯增加。阿莊今年嘅心水股中國南車（01766），昨日曾高見10.96元，收報10.8元，升4.45%。

產品應用範疇廣泛

半新股理士國際（00842）去年十一月中旬掛牌，招股價5.35元，咁啱撞正市況淡靜，掛牌以來股價一直尋底，上月十日見低位3.81元後回穩，之後一直沿10日線整固，近兩日開始有異動，昨日曾高見4.66元，收報4.54元，升6.57%，成交1.04億元，乃去年十一月十九日以來最大單日成交。

理士主要喺內地從事製銷沿酸蓄電池，產品可應用於電訊系統、不間斷電源系統（UPS）、可再生能源儲存系統、汽車、摩托車及其他車輛、其他消費類及工業產品。上市不久，公司即動作多多，上月宣布收購馬來西亞鉛酸蓄電池項目權益，另與成都最大嘅電動車品牌廠商組合營項目，藉此加快拓展動力電池業務，並開拓西部市場。

公司業務優勝之處，在於產品可應用於不同行業，如汽車、電訊、鐵路、消費及工業等多個範疇，多元化發展有助分散風險，而喺國策支持之下，單憑「新能源」概念，呢隻股亦應該唔愁炒作藉口。

再睇其股價走勢，似乎歷時逾月嘅收集期已完成，短線有力叩5元關，重返其上可重上水面，穿10日線4.2元止蝕。

戰報

御泰中彩（00555）彩票股本身亦好有博彩意味，積奇在十二月二十九日SUN勢力推介御泰中彩，由年尾贏到年頭，賺咗15.8%。

中國農產品（00149）錢進昨日在穿勻箭捉到隻航運股中海集運（02866）跑出，但論高低位波幅，中國農產品低買高沽可賺13%。