太子手記：滙豐鄭大班病愈復出
滙豐中國董事長鄭海泉自從舊年同公司請咗病假之後，好耐都冇喺滙控（00005）嘅活動中見到佢，尋日佢話咗個好消息畀大家聽，佢已經復工喇，仲已經返咗工幾個月添，鄭大班咁熟滙豐嘅業務，同內地關係又咁好，希望佢繼續代表滙豐講多啲意見，大家至有裨益。
對上一次見鄭大班出席公開場合，已經係舊年十月嘅中大活動，尋日佢同樣喺中大活動出現，皆因佢係中大校董會主席。
已經返工幾個月
尋日鄭海泉氣色都唔錯嘅，佢就話自己身體好番晒喇，依家唔使再去覆診，同埋返咗工都有幾個月，仲話好多謝大家嘅關心添！鄭大班會唔會咁快退休呀，佢話自己冇諗過呢樣嘢。
佢透露滙豐有興趣喺北京興建新總部大樓，會繼續增開新分行。佢話一直有同大陸商討解決推出上海國際板嘅技術問題，期望國際板今年內推出，亦都希望滙豐可成為首批在國際板上市嘅公司。
鄭海泉話身體好番晒。（資料圖片）