股海實戰：中國南車今年繼續睇好

一一年第一個交易日，阿莊祝各位股友今年投資旗開得勝，買嗰隻升嗰隻！

上周五大除夕港股僅得半日市，恒指全日高低波幅只有89點，收市23,035點，升36點，大市成交302億元。全年計，恒指按年升幅5.3%；與去年六月底比較，升幅則為14%，相對於去年上半年恒指跌7.9%，下半年表現勝於上半年，其中又以第三季為全年表現最佳嘅季度。

去年新股上市，無論以新股數目抑或集資額計，都係豐收之年，表現最佳嘅新股有去年六月掛牌嘅海東青新材料（02228），上周五收報7.46元，較招股價2.38元高出213%。

各大外資行經已對今年恒指表現作預測，基本上大方向都係睇升，實際目標介乎26,500至29,000點水平。阿莊就認為，港股能否一如市場普遍預期向上，十分視乎資金流向。正路啲諗，美國推QE2，熱錢出路唔多，新興市場係熱門好去處，故上半年股市表現確實在值得期待。

當然，投資者還是要做定兩手準備，特別係內地嘅貨幣政策已由適度寬鬆改變過來，「水喉」收緊咗，將直接影響股市交投，亦須關注內地加息的步伐，以及美國經濟復甦進度。

股類方面，阿莊認為今年內房股會以穩定為主，內銀股表現仍受限制，保險股會有較佳嘅表現。至於今年熱炒嘅家電及汽車股，會改以炒上落為主，市場焦點放喺新能源、資源、零售、鐵路基建、工業、三網融合等板塊。

講到實際推介，阿莊繼續睇好嘅個股，係中國南車（01766），理由主要有兩個。第一，所從事行業獲國策支持，前景向好；第二，公司喺行頭手執牛耳，享盡先機，未來三至五年盈利將進入高增長期。

去年末季，國務院副總理張德江明確表示，高鐵產業將納入「十二五」規劃嘅戰略性新興產業。可以預期，未來呢個產業將獲得優先發展。南車專門製銷鐵路機車、動組車及城軌車輛，管理層目標係喺明年實現年銷額1,000億元人民幣，而一五年將進一步上升至1,500億元人民幣。

銷售額明年達千億

去年首三季，南車實現銷售額430億元人民幣，如無意外全年計可突破600億元人民幣，用兩年時間實現年銷額1,000億元人民幣，呢個目標算係踏實。

換言之，到了明年底，公司年銷額將較○九年翻一番有多（○九年銷售額為456億元人民幣），故此雖然現價計○九年度往績市盈率為六十三倍，但股價升到上10元樓上仍未見有太大沽壓，反見有買盤密密收集。

事實上，除了內地高鐵產業蓬勃發展之外，近年公司喺開拓海外市場亦取得進展，正與美國通用電氣集團（GE）合作研究多個美國高鐵項目。業務增長有雙引擎驅動，前景有睇頭，股價自然可以睇高一線。

去年阿莊喺5元水平已持有南車股份，十一月上旬以平均價每股9.7元沽出20萬股，獲利75.6萬元，之後見股價走勢對辦，又再翻兜，目前持有13萬股。南車上周五收報10.22元，今年一於繼續捧場，正密切留意加注機會。

戰報

中聯重科（01157）

上月二十四日錢進指中聯重科估值便宜，當日低位16.26元，上周五創17.78元之上市新高，累計升幅近一成。

御泰中彩（00555）

積奇上周二指御泰中彩走勢轉佳，當日低位0.75元，上周五更以全日高位0.82元收市，升幅逾9%，眼光果然夠準！