大款生力軍接力炒港樓

踏入新一年，大家都希望樓市可以有個新開始。雖然成個禮拜樓市仍然係瀰漫住「大時大節」嘅氣氛，買家嘅入市意欲始終唔係咁高，加上內地政府喺聖誕節整咗份「大禮」畀全世界，就更加令到啲買家寧願睇定啲再算。不過，Paul少好多代理朋友都對於呢一輪傳統淡季後嘅市況，依然好有憧憬，希望農曆新年過後，成交量亦會跟隨回暖。

其實，Paul少之前都講過，二○一一年嘅樓市，好靠啲觀望咗市場一排嘅用家，同埋內地客去支撐。用家嘅數量喺現階段應該唔會有乜嘢好大嘅增減，除非政府再有新措施干預樓市。至於內地客嘅客量，變數就會比較多，事關依家內地要全力壓抑通脹，阻止熱錢流入，一定會有好多不同方面嘅政策，會陸續喺今年出台。

加息無礙來港投資

好多人都會認為，傳統上當加咗息之後，啲人就好可能會留多咗錢喺銀行，減少落嚟投資，加上明年內地嘅信貸亦都會進一步收緊，內地人投資嘅步伐亦都可能會減慢。不過，Paul少並唔係咁諗，Paul少相信內地客源仍然大有作為，皆因內地客無論喺乜嘢經濟環境底下，都好着重「買磚頭」，呢個不單係投資，同樣亦都係社會地位嘅象徵，但係阿爺喺今年嘅壓通脹措施裏面，房地產市場仍然係一個重點。可以預計得到，阿爺對調控內地房地產市場嘅力度只會有增無減。相對嚟講，香港嘅樓市就提供咗一個比較穩定嘅投資環境畀佢哋。

至於港府近期嘅壓抑樓價措施，只會對一班投機性重嘅內地客有較大影響。因為其實好多內地客都唔會介意中長線持貨，額外印花稅辣招並唔會令到內地客大打退堂鼓。

客源轉向二線城市

事實上，近年活躍於香港樓市嘅內地客，其實仍然係以內地一線城市，或者係廣東省一帶嘅人為主。以中國內地嘅幅員嚟講，仲有好多尚未「開發」嘅市場，只不過呢類二、三線城市嘅內地買家，對於香港樓市嘅資訊向來不足，當然唔會貿貿然攞一千幾百萬落嚟投資。

Paul少估計，到咗第二季，一啲發展商同埋地產代理，就會開始去嘗試開拓呢啲二、三線城市嘅客源，因為單靠「塘水滾塘魚」嘅話，實在好難捱得過全年。