戴維思助英栽培女董事
前渣打（02888）大班戴維思，無做英國貿易大臣之後仲繼續幫政府做嘢，好似近期佢就做緊一個性別不公平嘅諮詢，睇吓點樣提高女性喺英國公司嘅董事會參與度，至今佢已經同差唔多2,600人傾過呢個話題。有啲地方嘅交易所就硬性規定女性董事要佔一定比例，好似挪威嘅奧斯陸交易所咁，就規定要有40%嘅董事係女性。
無意規定男女比例
雖然有地方能夠成功執行呢個規定，但戴維思就唔係好認同硬性執行，佢同唔少女性傾過呢個問題，亦見到佢哋都唔同意咁做。
戴維思嘅想法係成立一個大約35至40人嘅委員會，去訓練一班女性，再配對畀適合嘅公司，並由佢哋去繼續培訓，培養一班人才出嚟。戴維思話，市場上有好多有才華嘅女性，人才方面絕對無問題。