股海實戰： 和記港陸有開車迹象

眨眼一年又就快過，明日就係大除夕。一○年本地樓市大炒特炒，結果惹來特區政府出手打擊炒風，但到現時為止只見炒賣個案減少，但未見樓價大跌，皆因低息環境持續，QE2下美元難以睇好，通脹又來勢洶洶，投資者都寧願繼續揸磚頭保值。

至於金魚缸，相對於去年底恒指收市點數21,872點，今年恒指料有進帳，但估計升幅不超過一成。不過，今年恒指高位在上月的24,988點，低位則在五月的18,971點，高低波幅達到6,017點，對炒家嚟講，亦帶來唔錯嘅搵食機會！

當然，末季港股成交明顯增加，相信有唔少散戶喺接近全年高位水平先至上車，未有離場者，今時今日也許仍坐在「艇」上。究竟明年能否「返家鄉」，阿莊就認為，明年三月藍籌業績前後，指數還是有機會做好，但下半年情況如何，仍要端視美息去向，變數較大，故嚟緊幾個月，若然真係見到升市，大家要好好把握搵銀機會！

今個聖誕旺季，本港零售市道唔錯，聽講業界估計今年生意額有一成至成半升幅，除咗本地人消費意欲唔錯之外，更大動力來自祖國同胞來港歡度佳節，但有別過往長假，今次只係惠及零售市場，大款未有積極掃樓！

板塊方面，雖然聖誕檔期零售市道向好，但本周零售股未見有太突出嘅表現，皆因早前經已預先透支升幅。此外，周初阿莊話汽車股隨時有反彈，表現果然對辦，昨見東風集團（00489）升3.42%，收報13.3元；華晨（01114）升4.76%，報5.72元；吉利汽車（00175）升3.6%，報3.44元。

內銀股值博率高

若然下周初兩地股市氣氛好轉，阿莊認為最值博嘅係內銀股，皆因上月以來內銀股跌勢已充分反映負面因素，包括人行可能改革銀行信貸管理體制，即改以銀行資本率釐定各行信貸額。另一方面，近次加息對內銀股影響係中性偏好，但股價表現未有反映。喺內銀股中，呢轉跌浪最傷嘅係農業銀行（01288）同中信銀行（00998），也許博短線反彈值博率會較高，但當然風險會成正比；穩陣之選則可取建行（00939）及工行（01398）。

細價股方面，炒味較濃嘅和記港陸（00715），自本月上旬抽上高位1.22元後便反覆回落，但近周跌至50日線0.99元現承接，昨見有炒家盤熱身，全日高位1.09元，收報1.07元，升8%，成交4,273萬元。

呢隻股炒重組概念已多時，勝在一路都未成為事實，致使呢個傳聞可以長炒長有，加上經常見到「大球場」陣勢，啱晒炒家胃口。昨日股價異動，可能又係開車訊號，小注博試破旗形，再衝1.2元阻力區，失守0.99元止蝕。

戰報

數碼通

（00315）本月十六日May推介數碼通（00315）時，低位只有12.38元，昨日股價高見14.82元，累計升幅近兩成。+20%

橙天嘉禾

（01132）上周一冼金基推介的橙天嘉禾，昨日以全日高位0.58元收市，以推介當日低位0.52元計，累計升幅達11%。+20%