恒生徐振文 轉睇紅藍籌
太子聽聞恒生銀行企業及商業銀行業務部有音樂椅遊戲玩，現時副總經理兼企業銀行業務主管吳源田（YT）就嚟退休，於是助理總經理兼商務理財業務主管徐振文（Thomas）就會頂上。
中小企戶月增二千
太子收到風，話Thomas過埋個農曆新年就會正式履新，到時由睇中小企轉去睇紅、藍籌企業，會由睇大量嘅企業，變成睇量大嘅企業。不過，發言人對於Thomas係咪調位就唔肯回應，話要等正式通告喎。
滙恒系列近年管理層都真係轉個不停，莫說滙控高層大執位，恒生自從梁太做咗CEO之後，都人事幾番新，Thomas執掌中小企業務，同事淨係幫啲客開戶口都開唔切，好似今年上半年淨計人民幣貿易結算戶口，成個恒生都開咗4,000個，聽聞下半年勢頭都好勁，中小企新開戶口每個月成2,000個添。
恒生徐振文將會轉睇紅、藍籌企業。