證監內地借將夠鐘換班

隨着中港金融進一步融合，兩地監管機構高層交流、借調，甚至羅致出任常設職位，或擔任顧問等，已經係大勢所趨。早於○七年已率先由中證監借調來香港證監會，擔任中國事務資深副總裁嘅孫杰，唔講唔知，原來已於數月前離職。

孫杰離職 接班人待定

咁大家一定好有興趣知邊位會接替佢，又或者會唔會再有另一位中證監嘅人士來港，以協助兩地溝通及加強合作？

坊間傳聞話中證監其實都有來港嘅適當人選，但唔知乜嘢原因，可能係近期證監會比較忙，連CEO都提早離任，暫時有關新接任人嘅消息，仍只聞樓梯響。亦有消息話證監會希望今次係以常設職位招聘。

講番孫杰，佢○七年五月嚟香港證監前，係中證監基金監管部主任，來港幾年，他為人非常低調，太子好少機會喺公開場合見到佢，更遑論做訪問，對佢嘅工作所知有限！

挾着人民幣國際化呢個咁龐大嘅機遇，監管機構近期已經密密邀請內地專才來港，協助發展人民幣業務。好似今年六月，金管局借調中國人民銀行前金融市場司司長穆懷朋為高級顧問。

港交所（00388）早前亦委任中證監基金部副主任楊秋梅，為市場發展科高級總監兼副主管，暨市場發展科轄下內地業務發展部主管。