節後樓市憂喜參半

聖誕節嚟到，Paul少首先喺度講聲Merry Christmas，祝願大家安居樂業。今年本港經濟比較好景，大家都可以喺歡樂氣氛中過節。雖然樓市自從喺上個月中畀政府踩咗一腳之後，到依家都未完全復原，但總結全年，樓市嘅表現仍然係近年最燦爛。

政府嘅辣招已經推出咗一個月有多，市場經過咗一輪驚恐時期之後，十二月中開始已經陸續有番啲起色。

細價樓復甦超預期

最令Paul少同埋一班代理朋友意外嘅，就係細價樓市場嘅復甦，似乎比預期為快。Paul少同代理朋友茶敍時聽到，主要係班小本炒家冇辦法上會，一定要低價掟貨嘅Case，比想像中少。另一方面，又有唔少用家趁勢入市，令到近排中小型樓嘅承接力唔錯，所以喺淡季前夕，市況未至於要「雪上加霜」。

代理朋友都話，過咗個快樂聖誕後，農曆新年前可唔可以繼續「衝」多一段，還是要面對「煙花過後嘅沉寂」，就仍然係未知之數。

Paul少估計，箇中嘅關鍵就係睇市場嗰批無力上會嘅炒家貨，究竟消化速度會有幾高。因為當呢啲「跳樓貨」消化得八八九九嘅時候，減價的壓力自然又會減低，市場可以盡快納入正軌。

不過，代理朋友都明白，炒家減價貨甩晒，並唔代表從此就「天下太平」。因為實在冇乜人可以好明確咁話到畀你聽，市場現存嘅購買力，會唔會大部分都係趁風高浪急、走出嚟執平貨之徒。如果真係咁嘅話，當樓價逐步回穩，呢啲購買力亦都會相應減退，咁個市始終都係無以為繼。

寄望市況細水長流

所以，代理朋友都話，未來一年，佢哋最指望嘅係「細水長流」，當然，未必會再有今年六、七月嗰段「風光日子」，但起碼都唔會再有啲「辣招」推出嚟。至於另一個指望，就係要睇未來一年內地班同胞嘅入市走勢。

觀乎年尾內地嘅經濟環境，未來一年北水南下買樓嘅形勢，相信會有好多變數，正所謂有喜有憂，下個星期元旦日，Paul少會再同大家來剖析一下。