張耀堂告別Visa濠江叉電
喺銀行界做咗好多年嘅張耀堂Sunny，一年幾前去咗Visa做香港及澳門地區總經理，太子聽講原來佢已經辭咗職，明年年初就會正式離任，Sunny依家就放緊假，遲啲會同屋企人過澳門玩幾日，之後就留喺香港，響應「留港消費、刺激經濟」。
下月離任 辛瑋達暫接手
Visa發言人話Sunny會喺一月七日正式離任，職務暫時會由喺Visa做咗十幾年嘅辛瑋達接手，不過暫時未知會由邊個繼任。
Sunny喺零售銀行方面有好多年經驗，先後做過花旗、道亨同埋星展，離開星展香港之後抖咗一排，○九年年初嗰陣就去咗Visa，當年信用卡啱啱喺香港推行嗰陣Sunny已經有份參與，所以當時大家都覺得佢同番啲銀行傾信用卡業務駕輕就熟，以Sunny豐富嘅經驗，若果以後重出江湖做番銀行絕對係好事。