Fundman睇市:比亞迪重拾增長諗得過

昨日港股睇實A股做人,平開、急跌,收市再跌幅收窄,唯一小插曲係中段外電報道南北韓邊境再傳炮聲,其後補充乃軍演所發,非南北韓互射,證實警鐘誤鳴,港股因而一度倒升,最後恒指跌75點,報22,639點,十二月期指罕有的出現高水,收報22,699點,先殺好友,再屠淡友,來回超過600點波幅的V形走勢,成交卻奀到得608億元,咁嘅市況勸各位都無謂做大戶點心,早啲收爐陪吓至愛親朋好過。

體育用品股李寧(02331)尋日急跌一成六,收報17.88元,跌3.37元,一來係透過注入前稱快意節能的非凡中國(08032)的金蟬脫殼,極可能過唔到監管機構一關,更重要嘅係,明年第二季的接單情況也令大行分析員失望,內需運動用品的高增長概念的光環無咗,天使跌落凡間,仲拖累埋其他運動用品股,普遍跌幅高於大市。

美銀美林指李寧第二季銷情差,調低其一一至一二年盈利預測10至11%,目標價降至23元,相當於17.7倍市盈率。唔知讀者有冇到過內地幾間大型體育用品品牌專門店,史提芬經驗係,價錢其實拍得住「飛刀」及「三間」等外國品牌,隨着內地人對外國品牌認知增加,加埋後者鋪天蓋地嘅廣告宣傳,去年筆者到過北京上海等兵家必爭之地後,已經唔敢話猛虎一定不敵地頭蟲。

李寧撈底未係時候

李寧○四年六月上市,估值最高係○八年京奧前的63倍,最低係○九年金融海嘯期間的10.4倍,平均係28倍,一○年估計係23.9倍。過去五年,盈利年增長介乎30.9至60.6%,平均都有50.8%,當然支持到高估值,但明年預測跌到10%左右,大品牌之間競爭如山雨欲來,似乎股價尋底機會高於反彈,唔係打落水狗,但想博反彈似乎未係時候。

前排睇到個英國節目,講全球環保汽車發展,今時今日,到底邊類環保車對環境最「友善」,各有各說法,日本認為油電混合最具效益,而豐田也取得相當成績,其混燃車在美洲及亞洲大賣;歐洲主攻柴油車,核電發展成熟的北歐,更密鑼緊鼓推出氫氣動力車,以電力把水的氫及氧分子分解,唯獨由水轉化為氫,需要大量能源而且儲存也不容易。

不過講到底,環保車近年迅速發展,靠的是原油價格高企,今日美國狂印銀紙加埋新興市場需求不斷,油價重返100美元似乎是指日可待,各國政府對環保汽車的傾斜政策,肯定非趕時髦的一時衝動。

發改委的低排汽車稅務優惠,將於年底結束,但換湯不換藥,年底前對特定低耗油型號提供即時價格補貼(3,000元人民幣),將取而代之。但無論新舊政策,比亞迪(01211)都有接近九成車款納入受優惠範圍,而更令人感興趣的,仲係其混燃及純電力汽車發展方面。明年,其混燃車款F3DM,以及純電動車E6,都準備推出市場試銷,並計劃於一兩年內,進軍北美。

估值返股神入貨位

上半年比亞迪賺24.33億元(人民幣.下同),但去到第三季縮晒水,跌到得番個零頭,只剩1,130萬元,主要係被指違法佔地被罰兼沒收七幢廠房的一次過損失拖累,以平均每季賺11億至12億元計,比亞迪市盈率十七倍左右,估值已差不多去番股神入股時水平。

如果股神無睇錯市的話,也相信環保車會為比亞迪帶來第二波高增長的話,股價42至43港元左右都可以諗得過。

跨媒體地產網新居入伙 幾萬個精選樓盤 歡迎睇樓!

Money18新功能「18好路數」為你預測心水股票升跌機會率

史提芬

比亞迪旗下純電動車E6即將推出市場,有望推動盈利重拾動力。(資料圖片)