股海實戰：俄鋁背景雄厚行業首選

港股交投持續淡靜，恒指昨日曾低見22,392點，但午後南韓軍演過後北韓未有動靜，加上A股尾市跌幅收窄，喺石油股靠穩以及中國移動（00941）止跌回升下，恒指一度唔使點跌，最終收報22,639點，跌75點，大市成交只有603億元。大家要有心理準備，嚟緊幾日大市交投會進一步轉靜，指數容易被舞高弄低，仍然停留喺金魚缸者，只有繼續炒股唔炒市！

久違了嘅炒股文化傳信（00343）宣布，擬進行二供一，每股作價0.35元，集資約1.2億至1.4億元。老實講，近幾年呢隻股仔業務發展乏善足陳，即使股市大炒，但亦未見其有動靜。今次終於打破沉默做番啲嘢，若然順利完成，不妨留意交投是否有改善，以及會否有新投資動作跟尾。

創業板股份非凡中國（08032）收購李寧公司（02331）之建議因被創業板上市委員會否決而遇阻，公司正就有關決定提出上訴，但股價就難免一跌，曾插穿0.3元，低見0.295元，收市報0.315元，跌20%，成交1.17億元；而李寧公司因亦受定單表現欠佳嘅雙重打擊拖累，股價急挫逾15%，收報17.88元，成交5.13億元。

老實講，隻非凡中國今年頭由0.12元起步，升到上九月初高位見0.98元，頭浸炒家獲利甚豐。至於今次公司上訴是否成功，阿莊亦同大家一樣係旁觀者，但見其股價已大不如前，若然真係要揀，與其要抄底呢隻創板股，阿莊寧願選擇有往績背景及資產基礎支持嘅李寧公司入手！

銀基有力再創新高

另一方面，上周五阿莊提及內地消費市道向好，釀酒商透過提價將成本漲幅轉嫁消費者。昨見銀基（00886）大股東配售予機構投資者嘅2,700多萬股上板，每股作價6.6元，涉及約1.79億元。該股昨日收市報7元，跌2.6%。基金求貨心切，相信整固過後有力再創新高。

回說昨日市況，阿莊又留意咗隻俄鋁（00486），高位曾見11.1元，收報10.98元，逆市升4.57%，成交9,679萬元，昨日高位正逼近歷史高位11.2元。俄鋁將每手股數由原來嘅6,000股改為1,000股，每手入場費大幅下降，有利於改善交投。

此外，聽聞近日俄鋁正籌備發行人仔債券，而公司發行嘅俄羅斯預託證券（RDR）會喺本周四開始買賣，咁多消息，難怪近月以來股價反覆向上，近兩個交易日升勢明顯。其實俄鋁呢隻股份跟其他鋁業股不同，分別在於有中俄友好嘅政治元素，有咁高層次嘅祝福，加上公司本身份屬全球最大嘅鋁生產商，估值可較同類股享有溢價。當然，股份價格升跌，長遠仲係取決於業績表現，但只要行業景氣改善，此股定必係板塊風向儀，可以視為鋁業股中嘅首選。

戰報

中國智能交通（01900）

姚午齊尋日指中智交通走勢突破，昨日果然逆市創5.78元新高，以低位5.25元計，單日升幅都有10%。

中國安芯（01149）

錢進上周四推介中國安芯時，當日低位2.4元，昨日創2.62元一年新高，累升逾9%。

\