太子手記：紀勤新大計減肥44磅

滙控（00005）行政總裁紀勤即將卸任，據聞家陣佢已經飛返去老家英國，不過唔好以為佢退下來後會好得閒，因為有個非常「艱巨」嘅任務等緊佢。

原來紀勤嘅任務目標同好多少女一樣─減肥，咪以為係求減幾磅，佢嘅目標係減20KG（44磅），大約等於4包家庭裝泰國香米咁重。為咗證明決心，紀勤仲同人打賭，輸咗嘅要捐100萬港元畀慈善團體。而佢嘅減肥大計其中一站，就係明年十一月參加紐約馬拉松。

講到三十七年嘅滙控生涯，紀勤話前主席浦偉士正直、有膽識，係影響佢最深，亦係佢最敬重嘅人，又話浦偉士無論對官還是對員工，為人直率，呢個個性同佢好似。

七月已知唔會做主席

咁佢同滙控係咪因冇得升任主席一職而不歡而散呢？答案係啱啱相反，紀勤就話從來無以辭職作要脅，早喺七月已經知道自己唔會做主席。

紀勤仲話，當佢知道董事會屬意范智廉做主席時，仲叫咗聲「Good Choice」，仲提議董事會升歐智華做行政總裁。佢話董事會想佢留多幾年幫手，不過佢認為係時候諗吓個人問題，所以冇答應。佢話離任冇遺憾，對前景充滿期待。

佢仲自爆話當年係阿媽睇到滙豐請人廣告，幫佢寫埋信申請，於是一做就三十七年，駐守過中東、新加坡，連旺角總行都做過。講起香港，佢真係有份深厚感情。前排太子喺尖沙咀Shopping，赫然發現紀勤同一間珠寶店做開幕嘉賓，據講紀勤喺旺角返工嘅時期，已經同珠寶店嘅老闆稔熟，睇嚟紀勤都幾念舊喎！