炒家賺頭蝕尾等過年

做生意好多都分淡旺季，樓市亦都唔例外。以往喺聖誕節前嘅呢個禮拜，就係轉淡嘅分水嶺，因為好多業主同埋買家，都陸續外遊。跟住到咗一月份，離農曆新年只剩番一個月，大家都會奉行「過年前唔搬屋」嘅傳統，於是樓市買賣亦都相應減少。

早兩年，樓市仲有班「炒鬼」出嚟去執「年晚煎堆」，但係今年班炒家都已經畀政府打沉咗，近排轉旺，都係全靠班用家支撐。Paul少同駐守將軍澳嘅譚區董傾電話，佢都話近排好多用家走出嚟，趁長假期前落決定，所以令到炒家一向唔多吼嘅將軍澳，反而成為咗近期大熱嘅區域，真係可以話「風水輪流轉」。

投資客吼15%折讓盤

另外，Paul少喺西九龍班代理朋友亦都報料，話今年曾經大熱嘅連約收租盤，依家淪落到變咗「賣剩蔗」，皆因現時十個買家之中，有九個都係趁樓市回軟買貨「自住」嘅用家，唔交吉盤根本唔能夠切合到佢哋嘅需要，加上物業有租約在身，按揭條款亦都「辣」咗好多，就算樓價平啲，對用家嚟講都未必有着數。雖然長線投資者可能會對呢類「跳樓」連約盤有興趣，但係物業投資市場市況仍未明朗化，而且Paul少亦講過，政府向短期轉手成交抽重稅，令到長線投資者嘅投資缺乏彈性，當市場突然起變化嘅時候往往「逃生無門」，所以長線投資者入市自然會再多一重考慮。所以，如果冇番12至15%嘅折讓，佢哋都未必會有興趣趁機執平貨。

基金大戶未蝕入肉

繼一大班散戶投資者割價出貨之後，近排又有基金同埋大戶陸續趕出貨，有啲甚至係「不計成本」，令人更加覺得佢哋對後市失咗信心。

其實，與其話呢班基金同埋大戶係「輸少當贏」，不如話佢哋「賺頭蝕尾」。事關好多基金同埋大戶，早喺上年已經密密入貨出貨，賺咗好幾轉，所以唔會有太大嘅財政壓力，今趟作勢趕「出貨」，旨在將資金轉到其他投資工具，同時亦都係趁機減磅。而且佢哋喺出貨之前，當然已經一早計掂晒數，條大數足夠cover咗最後呢個幾個「殺價盤」嘅蝕價，所以根本唔講得有乜嘢傷勢可言。

資金氾濫仍有轉機

話時話，Paul少都覺得，後市並唔係咁一面倒睇淡，皆因市場資金仍然好充裕，但依家嘅「遊戲規則」唔利物業投資者，而且除咗樓市，街外亦都有其他嘅投資選擇，所以資金好自然唔會流入樓市。

不過，當其他投資工具嘅價格升咗一截，「水位」已經大幅收窄嘅時候，物業或者又會再 次畀投資者垂青。