太子手記：周福安爆冷落選會公
本來有望問鼎新一屆會計師公會會長嘅思捷環球（00330）執行董事暨財務總裁周福安，尋日喺會計師公會理事會選舉竟然爆冷「撻Q」，未能成功連任理事，令一眾會計界尤其係嚟自商界嘅人士大跌眼鏡，紛紛為佢抱不平。
周光暉促改選舉規則
其中一個係中遠太平洋（01199）獨立非執行董事周光暉，喺○二年亦有過相同嘅「撻Q」經驗，當年佢係公會副會長，亦喺選舉落敗，固感同身受。
周光暉話，周福安係恒指成分股CFO，喺商界有地位，自○四年起已加入公會理事會，勤力又有貢獻，對佢落選好意外，歸根究柢係商界票源不多，票源集中喺執業會計師（如四大會計師行）及學術界等，佢認為「小圈子」選舉合法但不合情、不合理，係時候改革公會理事會選舉嘅「遊戲規則」。公會下月公布兩名增選理事人選，外界關注會否推舉周福安為其中一名增選理事。