太子手記：黃光裕妹妹順利入局
國美（00493）股權爭戰擾攘咗四個多月，雙方終於「傾掂數」，尋日嘅股東特別大會以大比數通過大股東黃光裕嘅兩名親信入董事局，由於市場預咗呢個結果，所以尋日場面就無「9．28」嗰次咁墟冚。
尋日股東大會嘅投票率達六成七，其中九成股東投票贊成董事人數增至13人，同時，亦贊成黃光裕代表鄒曉春及其妹黃燕虹即時擔任執行董事及非執行董事。
股東大會氣氛輕鬆
太子傳媒老友一早到現場，見到唔少記者早已部署報道呢個股東大會，唔少內地記者仲即時上網報道呢件事，但係現場所見，氣氛較「9．28」輕鬆，皆因嗰次股東會公司主席陳曉同黃氏嘅勝算可一半一半，場面氣氛凝重，公布股東投票結果時，猶如等待放榜般。
尋日股東會後，鄒曉春以勝利者身份話，良好嘅公司治理絕對唔會排擠大股東喺董事會嘅合理席位及權力，不過有國美內部人士認為，雖然兩者目標一致，但仍存在分歧，內部管理之爭啱啱先開始。