Fundman睇市：中電可趁壞消息買貨

西班牙政府債券評級被穆迪將其列入觀察名單，前日嚇到港股急插超過400點。睇番外圍反應冷靜得多，西班牙主權債務信貸違約掉期（CDS）溢價不升反跌，前日去番317點子收市，較上月底高位364點子低一截，美股亦只係微跌20點，同港股的插水式走勢比較差天共地。尋日恒指再跌306點，收報22,668點，跌穿十一月底做出的低位22,785點，淡友得勢不求饒人，期指大低水116點，收報22,552點。

特區政府財金大員出名係慢半拍，近期不斷亮相於大小媒體，話熱錢點樣影響香港、製造資產泡沫，但實情港股十一月八日見高位24,988點，港元三個月期拆息也於翌日，即十一月九日見0.24厘低位，跟住級級上，執筆時已在0.3175厘，是接近兩個月的高位。美電由強方兌換保證上限7.75，縮番去今年七至八月時的7.77水平（當時港股仲响21,000點樓下），當政府仲諗緊計點樣壓抑熱錢在香港資產市場興風作浪，大孖沙手上銀彈其實早有流出迹象，在看到港元及拆息轉勢之前，淡友的形勢似乎相對佔優。

國指全年不進反退

臨近年尾港股咁跌法，恒指以年初起步位計，得番唔夠800點進帳，升幅得3.6%；國企仲大鑊，跌2.8%。仲記得年初全世界都睇好今年中國股市表現，唔少將中國股市列為確信買入對象，結果表現比美股更差。

另一個令筆者感到意外嘅係兩隻本地電力股。本以為兩電遭削減准許利潤，要有兩三年捱（重新擴大固定投資，彌補准許利潤回落到9.9%的效果），誰不知表現一啲都唔失禮，年初至今，中電（00002）股價累升20.2%，港燈（00006）都升咗16.6%，跑贏恒指之餘，計埋收息，回報都算和味。

兩電剛表示要加電費，港燈將整體上調電價2.8%，中電基本電費保持不變，但燃料價格條款收費，每度上調2.6仙，變相又係加2.8%，意外的是兩電股價未有因為加價消息做好，港燈尋日跌0.55元，報49.2元，橫行近兩個月的中電亦跌0.2元，收市報63.05元。

債務評級或會下調

中電前日公布旗下澳洲能源公司TRUenergy，收購澳洲新南威爾斯省政府招標出售的國營能源資產，包括Energy Australia、Delta Western及Wallerawang等能源項目，總代價為20.35億澳元（約155.95億港元），由於出資主要透過融資，穆迪將中電債務評級放入可能下調名單，不過其實有關影響已經預咗。近年積極擴展海外市場減低對香港市場依賴，由正面去看，今次交易作價比分析員估計低，亦令TRUenergy「晒士」膨脹不少，有條件在未來兩三年內獨立分拆出來，等中電享受到投資股本化嘅好處。有接近4厘股息回報撐住，降級消息，反而為捧場客提供買入這極穩健藍籌的機會。