摩笛樂韻暖人間
大摩班高層平日忙於睇實大市，仲不時吹奏「摩笛」引發股價波動，不過尋日太子再次見識呢班高層嘅音樂造詣時，就一啲都唔驚，仲零舍溫暖。因為「摩根士丹利董事合唱團」趁住聖誕節又再次出動，第二年喺「圓方」表演唱聖誕歌，兼為慈善機構籌款。
逾90高層齊獻唱
亞洲首席執行官唐奧文負責領唱之餘，台上又有一班香港保護兒童協會嘅小朋友伴唱，加上現場有贊助商嘅熱朱古力同曲奇，令所有觀眾都立即暖在心頭。
大摩已經係連續第十三年支持「愛心聖誕大行動」（Operation Santa Claus），今年大摩就有超過90位管理層獻唱8首歌，無論人數、歌曲數量都有加無減，就連善款都再創新高。
唐奧文同太子講，今年十二月九日開始籌款，大摩嘅員工、客戶及夥伴已經成功喺短短一周內，籌到210萬元，突破去年190萬捐款，佢當然覺得驕傲啦。大摩全球援助服務主題着重小朋友健康，所以今年籌款對象係「微笑行動」的「2011年春之微笑」（Spring Smile 2011），呢個計劃主要幫助內地杭州近300位小朋友，進行顎裂及兔唇手術。