趙國雄父女差一個A
年輕八十後嘅趙宇（Justina）不單係置富產業信託（00778）嘅副行政總裁，亦係長實（00001）執行董事趙國雄（Justin）嘅愛女，兩父女英文名只係差一個英文字母。
太子尋日見到Justina，當然趁機會問一問佢，佢話出世紙已經有登記英文名Justina，唔知爸爸點解要用呢個英文名，不過就笑稱：「可能係佢懶」，喺自己個名加多個a字就算數，Justina仲話，雖然個名較男仔，但亦比較特別，所以都幾好。
置富產業信託喺今年三月以介紹形式喺香港上市，旗下有唔少商場，至於聖誕節臨近，大大小小嘅商場都會大搞節日活動，置富產業信託亦會請歌手到商場表演，Justina話自己比較偏好請男歌手，好似今個聖誕節就請咗4位歌手，3個係男，女歌手只有1個，太子好奇點解男多過女。
請歌手男女有別
Justina話男歌手嘅女粉絲比較多，女仔睇完表演後，多數會留喺場內買嘢、食嘢，有助推高生意額，至於男粉絲隨時只係食個包就走人，所以男、女粉絲嘅消費力係有好大差別嘅。