期指攻略：假期氣氛籠罩 寧不入市
尋日港股成交進一步萎縮，跌到得575億元，係三個月以來的最低紀錄，睇見仲有十二個交易日先至過年，但港股市況經已係悶到暈，筆者心諗真係不如早啲放假外遊好過。
尋日，恒指升113點，收報23,431點，撇開開市及收市前的十五分鐘，大市九成時間在23,330至23,390點之間幾十點上落，完全無方向，即使三點左右，滬綜指在資源及水泥股帶動下，重返水平線上收市，但港股依然紋風不動，若非最後十五分鐘，內銀股重返高位收市，加埋神華（01088）及中海油（00883）等強勢，恐怕恒指升幅及大市成交，會更慘不忍睹。
滬綜指突破橫行區
不妨留意，內地股市似乎已完全消化來年貨幣政策調節的影響，滬綜指重返50日平均線樓上兩日，也衝破2,791至2,904點橫行區的悶局，若強勢持續，可能幫到港股在低成交下，向上挑戰23,625點甚至23,867點兩大阻力。
十二月期指昨收23,390點，未有跟足現貨最後一段升幅，低水擴大到41點，手上的23,200點馬鞍式期權短倉，期權金進一步收窄到690點。在市況開始充斥假日氣氛，交投日漸疏落之下，筆者不打算貿然入市賭單邊方向，除非現貨升穿23,867點，破壞頭肩頂阻力，則作別論。
