股海實戰：秦發上升動力浪接浪

港股昨日再度高收，恒指全日高見23,453點，收報23,431點，升113點，但成交進一步下降至僅575億元。值得一提係收市前十五分鐘現貨成交增加，估計超過120億元，滙控（00005）、個別內銀股、石油、貴金屬股表現較強。

內地滬綜指昨日亦未見有太大回吐壓力，高位做2,933點，收報2,927點，升4點。官方傳媒報道，二○一一年CPI漲幅目標為4%，而明年GDP增長目標為8%，可見內地經濟保持穩快增長嘅基調未變，並會接受適度嘅通脹。

另一邊廂，人行行長周小川最近亦表示，要把穩定價格總水平放喺更加突出嘅位置，實施穩健嘅貨幣政策，把好「流動性」呢個總閘門，把信貸資金更多投向實體經濟，特別係「三農」和中小企業。阿莊有感，明年國策一字記之曰「穩」，股市波幅會相應收窄，而股份方面，明年投資組合中，農業股係少不得嘅股類。

除此之外，石油股中海油（00883）昨日創五十二周即市新高18.66元，收報18.48元，升0.76%；中石油（00857）昨日收報10元，升0.6%，距離五十二周高位10.54元不遠，且看能否後來居上。國際銅價上升，江銅（00358）股價亦靠穩，收報25.15元，升0.2%；鋼鐵股鞍鋼（00347）及馬鋼（00323）均升逾3%。

另一個有資金流入嘅板塊係煤炭股，中國神華（01088）及中煤能源（01898）分別升3.7及2.9%，阿莊持有嘅福山能源（00639）上周股價見高位5.65元後再度回落，但5元邊現承接，昨日收報5.27元，升2.7%。由於阿莊經已洗濕個頭，惟有睇睇月底前有冇機會平手落車。

山西煤礦投產增收益

講起煤炭相關股份，又可以睇睇中國秦發（00866）。公司主要做銷售煤炭、運輸等業務，今年上半年主營業務明顯復甦，純利同比增長17.9倍，至2.06億元人民幣。去年煤炭價格大跌，公司睇準機會，去年八月斥1.3億元人民幣收購喺山西經營優質動力煤礦嘅瑞風煤業87.88%股權，交易於今年二月完成，隨着該煤礦喺今年下半年投產，料可帶來新嘅收益來源。

受惠煤炭股氣氛好轉，秦發股價昨日做好，以全日最高位4.5元收市，升幅6.8%，成交2,315萬元。城中名牌基金喺十月初開始披露已持有秦發股權逾5%，其後多次在市場增持，最新持股量已超過7%。

過去兩個月，秦發股價波動明顯擴大，呈一浪高於一浪。上周股價見本輪調整低位4元後展反彈浪，昨日成交增加，係咪基金股東再入場加注，不得而知，但若然一浪高於一浪嘅趨勢持續，投資者可趁今輪升勢博炒一轉，目標可定喺5元樓上，穿4元即止蝕。

戰報

第一視頻（00082）

積奇上周三建議短炒第一視頻，當日低位2.45元，昨日股價高見2.65元，累積升幅逾8%，果然眼光夠準。

國聯通信（08060）

上周三錢進推介的國聯通信，昨日高見0.5元，較推介當日低位0.415元，累升逾兩成。